დასავლეთ აფრიკის ქვეყანა განა გახდა პირველი, რომელმაც Covax პლატფორმის მეშვეობით ვაქცინა მიიღო. ასტრაზენეკას ვაქცინის 600 000 დოზა განას დედაქალაქ აკრაში დღეს ჩავიდა.

მოელიან, რომ განაში ვაქცინაცია სავარაუდოდ მომავალი კვირიდან დაიწყება. ვაქცინის პირველ დოზებს თავდაპირველად პრიორიტეტული ჯგუფები მიიღებენ: ჯანდაცვის მუშაკები, 60 წელს გადაცილებული ადამიანები და სხვა.

ჯანმრთელობის მსოფლიო ორგანიზაციისა და გაეროს ბავშვთა ფონდის ერთობლივ განცხადებაში ნათქვამია, რომ Covax პლატფორმიდან ვაქცინის განაწილების პროცესის დაწყება უმნიშვნელოვანესი მოვლენაა პანდემიის დასრულების გზაზე.

გაეროს ბავშვთა ფონდი მონაწილეობას იღებს ვაქცინის განაწილების ლოგისტიკური საკითხების მოგვარებაში.

განაში, რომელის მოსახლეობა 30 მილიონ ადამიანს ითვლის, პანდემიის დაწყების დღიდან, კორონავირუსის 81 000-მდე შემთხვევა დაფიქსირდა, გარდაიცვალა 580 ადამიანი. იუწყებიან, რომ ეს მონაცემები რეალურ ციფრებს ჩამოუვარდება, რადგან განაში ტესტირება სათანადო რაოდენობით არ ტარდებოდა.

ჯანმრთელობის მსოფლიო ორგანიზაციის (WHO) Covax პროგრამა მიზნად ისახავს უზრუნველყოს ვაქცინების სამართლიანი განაწილება ყველა ქვეყანაში.

პლატფორმის მეშვეობით წლის ბოლომდე დაგეგმილია მსოფლიოს მასშტაბით კორონავირუსის საწინააღმდეგო ვაქცინის დაახლოებით 2 მლრდ დოზის გავრცელება.