რუსეთმა აშშ-ის სანქციებს მკაცრად უნდა უპასუხოს, ვაშინგტონი ყველა ზღვარს გადავიდა, - ამის შესახებ რუსეთის ფედერაციის საბჭოს საგარეო კომიტეტის თავმჯდომარის მოადგილემ ვლადიმირ ჯაბაროვმა განაცხადა.

„რუსეთმა მკაცრი პასუხი უნდა გასცეს აშშ-ის სანქციებს, ვაშინგტონი ყველა ზღვარს გადავიდა. იქმნება ისეთი შთაბეჭდილება, რომ მათთვის უკვე სულერთია მიზეზი, ოღონდ სანქციები შემოიღონ“, - აღნიშნა ჯაბაროვმა.

„რისთვის სჯიან უსაფრთხოების ფედერალურ სამსახურს? არ არსებობს არც სასამართლოს გადაწყვეტილება, არც გამოძიება. გერმანიაში ჩასვლიდან მეორე დღესვე ნავალნი საავადმყოფოს კორიდორებში დადიოდა, ერთი კვირის შემდეგ კი ბერლინის ქუჩებში სეირნობდა. ამ ყველაფრის შემდეგ გვეუბნებიან, რომ ის თითქოს „ნივიჩოკით“ მოწამლეს“, - აღნიშნა ჯაბაროვმა.

შეერთებულმა შტატებმა და ევროკავშირმა რუს მაღალჩინოსნებსა და ორგანიზაციებს ალექსეი ნავალნის საქმეზე სანქციები დაუწესა. ამის გარდა აშშ-ის დაზვერვამ რუსეთის უსაფრთხოების ფედერალური სამსახური ნავალნის მოწამვლაში დაადანაშაულა.

ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.

ალექსეი ნავალნი 17 იანვარს მოსკოვის შერემეტიოვოს აეროპორტში საპასპორტო კონტროლის გავლის დროს, ბერლინიდან ჩაფრენის შემდეგ დააკავეს.