ყველამ ნერვები უნდა მოვთოკოთ და დავსხდეთ მაგიდასთან იმისთვის, რომ შედეგი იყოს ძალიან კონკრეტული, - ამის შესახებ"ნაციონალური მოძრაობის" ოფისში ოპოზიცური პარტიის შეხვედრის დასრულების შემდეგ "ევროპული საქართველოს" გენერალურმა მდივანმა, გიგი უგულავამ თქვა.

მისივე თქმით, "ოცნებასთან" მოლაპარაკებები ვერ იქნება სრულფასოვანი ვიდრე მას ენმ-ს თავმჯდომარე, პოლიტპატიმარი ნიკა მელია არ დაესწრება.

"ბუნებრივია, პოლიტიკური პატიმრებისა და რიგგარეშე არჩევნების საკითხი არის მთავარი საკითხი, რომელსაც ჩვენ ვაყენებთ და ველოდებით შემხვედრ ნაბიჯებს. შემხვედრი ნაბიჯი, ჩემი აზრით, დაგვიანებულიც არის, იმიტომ, რომ 16 მარტს, როცა ბრიუსელში საქართველოს ასოცირების საბჭოს სხდომა გაიმართება, ქართული მხარე კონკრეტული წინადადებებით უნდა წარსდგეს. ამ წინადადებებს სჭირდება გავლა, დამუშავება, შეჯერება, შესაბამისად დრო არის ძალიან ცოტა", - ამბობს გიგი უგულავა.

ოპოზიციამ საპროტესტო აქციების ნაწილი გადადო, ნაწილს კი ფორმა შეუცვალა.