არ წავახალისებთ დემოკრატიას ძვირიანი სამხედრო ინტერვენციებით ან ავტორიტარული რეჟიმების ძალისმიერი დამხობის მცდელობით, – ამის შესახებ აშშ-ის სახელმწიფო მდივანმა, ენტონი ბლინკენმა საგარეო პოლიტიკის წარდგენისას განაცხადა.

მისი თქმით, აშშ განაახლებს დემოკრატიას, რადგან ის საფრთხის ქვეშაა.

„ჩვენ სტიმულს მივცემთ დემოკრატიულ ქცევას. თუმცა, არ წავახალისებთ დემოკრატიას ძვირიანი სამხედრო ინტერვენციებით ან ავტორიტარული რეჟიმების ძალისმიერი დამხობის მცდელობით. ჩვენ ეს ტაქტიკები წარსულში ვცადეთ. როგორი კეთილი ზრახვაც არ უნდა ჰქონოდა, ამან არ იმუშავა“, – განაცხადა ენტონი ბლინკენმა.

მისი თქმით, სუსტი დემოკრატიის მქონე ქვეყნები უფრო მოწყვლადია ექსტრემისტული მოძრაობების მიმართ და ისინი ნაკლებად სანდო პარტნიორები არიან აშშ-სთვის. ძლიერი დემოკრატიის ქვეყნები კი მეტად ერთგულნი არიან ადამიანის უფლებების მიმართ.

„როდესაც დემოკრატია სუსტია, მთავრობებს არ შეუძლიათ საკუთარი მოქალაქეების უზრუნველყოფა ან ქვეყანა იმდენად პოლარიზებული ხდება, რომ რთულია რაიმეს გაკეთება, რადგან ისინი უფრო მოწყვლადები ხდებიან ექსტრემისტული მოძრაობების მიმართ შიგნიდან და გარე ჩარევის წინაშე. ისინი ნაკლებად სანდო პარტნიორები ხდებიან აშშ-ისთვის, რაც ჩვენი ქვეყნის ეროვნულ ინტერესებში არ არის“, – აღნიშნა სახელმწიფო მდივანმა.