შეერთებული შტატებმა უკრაინელ ოლიგარქ იგორ კოლომოისკის და მის ოჯახს სანქციები დაუწესა. ამის შესახებ ნათქვამია სახელმწიფო მდივან ენტონი ბლინკენის განცხადებაში, რომელსაც უკრაინაში აშშ-ის საელჩო ავრცელებს.

"ვაცხადებ იგორ კოლომოისკის სანქცირების შესახებ, რომელიც 2014-2015 წლებში უკრაინის დნეპროპეტროვსკის ოლქის გუბერნატორად მუშაობისას, მონაწილეობდა კორუფციულ ქმედებებში, რამაც შეარყია კანონის უზენაესობა და უკრაინის საზოგადოების რწმენა მათი მთავრობის დემოკრატიული ინსტიტუტების მიმართ", - ნათქვამია ბლინკენის განცხადებაში.

სახელმწიფო მდივნის განცხადებაში აღნიშნულია, რომ სასანქციო ზომები ეხება კოლომოისკის თანამდებობაზე ყოფნის პერიოდს, თუმცა მისი ამჟამინდელი ქმედებები, დააბრკოლოს დემოკრატიული პროცესები და ინსტიტუტები უკრაინაში, შემაშფოთებელია და წარმოადგენს სერიოზულ საფრთხეს ქვეყნის მომავლისთვის.

სანქცირებულთა სიაში მოხვდნენ იგორ კოლომოისკის მეუღლე ირინა კოლომოისკა, ქალიშვილი ანგელიკა კოლომოისკა და ვაჟი ისრაელ ზვი კოლომოისკი. ყველა მათგანს აშშ-ში შესვლა ეკრძალებათ.

"ეს გადაწყვეტილება კიდევ ერთხელ ადასტურებს აშშ-ს ვალდებულებას მხარი დაუჭიროს რეფორმებს უკრაინის პოლიტიკურ, ეკონომიკურ და მართლმსაჯულების სექტორში, რომლებიც საკვანძო მნიშვნელობისაა უკრაინის ევროატლანტიკური ინტეგრაციისთვის. სახელმწიფო დეპარტამენტი გააგრძელებს მსგავსი უფლებამოსილების გამოყენებას ამ რეგიონსა და გლობალური მასშტაბით კორუმპირებული პირების ანგარიშვალდებულების ასამაღლებლად", - აცხადებს ენტონი ბლინკენი.