აშშ-ში მცხოვრები და მომუშავე ქართველი ექიმი, ზურაბ გურული ახალციხეში მომხდარ ფაქტს ეხმიანება.

ზურაბ გურულის თქმით, ანაფილაქსური შოკი არის აბსოლუტურად ყველა სახის ვაქცინის შესაძლო, იშვიათი გვერდითი ეფექტი და მისი განვითარება არ ნიშნავს ვაქცინის უხარისხობას.

"ანაფილაქსური შოკის სტანდარტული მკურნალობის მთავარ კომპონენტს წარმოადგენს ადრენალინი. არსებობს ასევე იშვიათი შემთხვევები, როდესაც ანაფილაქსური რეაქცია არ ემორჩილება ადრენალინით მკურნალობას. მაშინ მართვითი სუნთქვა და სხვა მედიკამენტებია საჭირო, მათ შორის სტეროიდები. გართულებული და ადრენალინის მიმართ რეზისტენტული ანაფილაქსური რეაქცია რთული სამართავია, მაგრამ აბსოლუტურად უმეტეს შემთხვევაში დადებითად სრულდება და არ ახლავს ფატალური შედეგი.წარმოუდგენელი უზნეობაა ( სამედიცინო საზოგადოების წარმომადგენლებისაგან კი არაპროფესიონალიზმი ) ამ სამწუხარო შემთხვევის შესახებ ნიშნის მოგებით საუბარი, რადგან ასეთი იშვიათი გვერდითი ეფექტის თავიდან აცილება პრაქტიკულად შეუძლებელია მასიური ვაქცინაციების დროს. სრული მხარდაჭერა და საუკეთესო სურვილები პაციენტსა და მის ოჯახს", - წერს ზურაბ გურული.

შეგახსენებთ, დღეს, ახალციხეში ვაქცინის გაკეთების შემდეგ ექთანს, პირველად ინფორმაციით, ანაფილაქსიური შოკი განუვითარდა.

27 წლის ექთანი ხელოვნურ სუნთქვაზე იმყოფება და კატასტროფის ბრიგადას თბილისში გადმოჰყავს.