ცოტა უხერხულია შეკითხვა, არის თუ არა ქვეყანაში ადრენალინი - ასე უპასუხა საქართველოს ჯანდაცვის მინისტრის მოადგილემ, თამარ გაბუნიამ ჟურნალისტის მიერ დასმულ შეკითხვას, არის თუ ქვეყანაში საკმარისი რაოდენობის ადრენალინი და აქვთ თუ არა ის კლინიკებს, სადაც ვაქცინაცია ტარდებოდა.

გაბუნიას თქმით, ადრენალინი არის ეპინეფრინის შემადგენელი ნივთიერება, რომელიც ნებისმიერ დაწესებულებაში არსებობს.

"ადრენალინი არის ნივთიერება, რომელიც ნაჩვენებია პროტოკოლით. მისი მარაგიც არსებობს და ასევე, ის ყველა დაწესებულებაშია. მის გარეშე, სამედიცინო დაწესებულება ვერ მუშაობს. ცოტა უხერხულიცაა კითხვა, არის თუ არა ქვეყანაში ადრენალინი", - განაცხადა თამარ გაბუნიამ.

მინისტრის მოადგილის განცხადებით, 27 წლის ექთანს ახალციხის კლინიკაში გაუკეთდა ადრენალინი.

ახალციხიდან გადმოყვანილი 27 წლის ექთანი, რომლის მდგომარეობაც გუშინ, აცრის შემდეგ დამძიმდა, პირველ საუნივერსიტეტო კლინიკაში დღეს გარდაიცვალა.