ესტონეთი ჩეხეთის სოლიდარობის ნიშნად, რუს დიპლომატს ქვეყნიდან აძევებს. ინფორმაციას ესტონეთის საგარეო საქმეთა სამინისტროს  პრესსამსახური ავრცელებს.

უწყება აღნიშნავს, რომ ესტონეთში რუსეთის ელჩი ალექსანდრ პეტროვი საგარეო საქმეთა სამინისტროში დაიბარეს, სადაც გამოუცხადეს მტკიცე პროტესტი ჩეხეთში, 2014 წელს საბრძოლო მასალების საცავზე რუსული სპეცსამსახურების თანამშრომლების თავდასხმის გამო.

„სოლიდარობის ნიშნად, ესტონეთი აძევებს ერთ რუს დიპლომატს, რომლის საქმიანობა არ შეეფერება ვენის კონვენციასთან შეთანხმებულ დიპლომატიურ საქმიანობას“, - ნათქვამია უწყების განცხადებაში.

გასულ კვირას, ჩეხეთმა რუსეთის საელჩოს 18 თანამშრომელი გააძევა. ჩეხეთის მხარე დარწმუნებულია, რომ გაძევებული "დიპლომატები" მონაწილეობდნენ 2014 წელს ჩეხეთში მომხდარ საბრძოლო მასალების საცავის აფეთქებაში, რასაც ორი ადამიანი ემსხვერპლა. საპასუხოდ, რუსეთმა ქვეყნიდან 20 ჩეხი დიპლომატი გააძევა.

ჩეხეთის სოლიდარობის ნიშნად რუსი დიპლომატები გააძევა სლოვაკეთმაც.