"ნამახვანჰესის" საწინააღმდეგო აქციის ერთ-ერთი ორგანიზატორის, ვარლამ გოლეთიანის განცხადებით, მთავრობამ არ გაითვალისწინა მათი მოთხოვნები, რის გამოც 23 მაისიდან თბილისში დაიწყება უწყვეტი და ფართომასშტაბიანი აქციები.

გოლეთიანის განცხადებით, დიალოგის დასაწყებად, აუცილებელი პირობა იყო, ხელისუფლებას დაეშვა იმის შესაძლებლობა, რომ ჰესი შესაძლოა არ აშენებულიყო, თუმცა ეს პირობა არ იქნა გათვალისწინებული.

"გვქონდა დაახლოებით ეს მოლოდინი, რომ ამ მიმართულებით წაგვიყვანდა ხელისუფლება თავად. ნამდვილად არ გვსიამოვნებს ფართომასშტაბიანი აქციების გზა. გვერჩივნა დიალოგის ფორმატში გადაგვეწყვიტა ეს საკითხები, თუმცაღა ხელისუფლება ცდილობს, რომ ეს ვექტორი სხვაგან წავიდეს, რომ საკითხებში შინააარსობრივად არ შევიდეთ და მართლა შინაარსობრივი საუბრები არ გაიმართოს ჩვენ შორის. ახლა დღევანდელი განცხადებაც ამის მკაფიო მაგალითია. ამიტომ, მოგვიწევს უკვე, რომ მთელმა ერმა და საზოგადოებამ გადავწყვიტოთ ჩვენი სიმრავლით და ერთობით ეს პრობლემა", - აღნიშნა ვარლამ გოლეთიანმა.

შეგახსენებთ, დღეს, "ნამახვანჰესის" აქციის ორგანიზატორთა მოთხოვნების საპასუხოდ, გამოაქვეყნა განცხადება, სადაც პროექტის ირგვლივ მიღებული გადაწყვეტილებების შესახებ არის საუბარი.