მოსკოვმა იტალიის საელჩოს თანამშრომელი რომის ქმედების საპასუხოდ ქვეყნიდან გააძევა. ამის შესახებ რუსეთის საგარეო საქმეთა სამინისტროში განაცხადეს.

უწყებაში თქვეს, რომ იტალიის ელჩი პასკუალე ტერაჩანო საგარეო საქმეთა სამინისტროში დაიბარეს, სადაც გადასცეს ნოტა თავდაცვის საკითხებში იტალიის საელჩოს მრჩევლის კურციო პაჩიფიჩის პერსონა ნონ გრატად გამოცხადების შესახებ.

იტალიელმა დიპლომატმა რუსეთი 24 საათის განმავლობაში უნდა დატოვოს. უწყებაში ასევე განაცხადეს, რომ იტალიის ხელისუფლების ქმედება არამეგობრული და უსაფუძვლოა.

თავის მხრივ, რომში მოსკოვის გადაწყვეტილებას უსამართლო უწოდეს. 30 მარტს იტალიელმა კარაბინერებმა რომში რუსეთის საელჩოში აკრედიტებული რუსი ოფიცერი და იტალიის შეიარაღებული ძალების კაპიტანი შპიონაჟის ბრალდებით დააკავეს.

რუსეთსა და დასავლეთის ქვეყნებს შორის ურთიერთობა სულ უფრო უარესდება, ბოლო კვირების განმავლობაში რუსი დიპლომატები გააძევეს აშშ-მა, ბულგარეთმა, უკრაინამ, ჩეხეთმა, სლოვაკეთმა, პოლონეთმა, ლიეტუვამ, ლატვიამ და ესტონეთმა. დღეს ასევე ცნობილი გახდა, რომ რუსი დიპლომატი გააძევა რუმინეთმაც.