ლევან ვასაძემ 9 აპრილის ბაღში მოსახლეობას საზოგადოებრივი მოძრაობის - "ერთობა, რაობა, იმედი" - დაფუძნება ამცნო.

ვასაძის განცხადებით, ის პოლიტიკაში ფუჭი დაპირებების გასაცემად არ მოსულა და ყველას მოუწოდა, ქვეყნის გადასარჩენად მუხლჩაუხრელ შრომაში მასთან ერთად ჩაებან.

მისივე თქმით, საზოგადოებრივი მოძრაობა "ერთობა, რაობა, იმედი" სულ მალე პოლიტიკურ პარტიად გარდაიქმნება.

"მტკიცედ გვწამს, რომ ქართველი ხალხის მხარდაჭერით, შევძლებთ, გავაღრვიოთ მოჯადოებული წრე, რომელზეც მოძრაობას საქართველო 30 წელია და გავიყვანოთ ის თავისი ღირსეული განვითარების იმ ტრაექტორიაზე, რომელიც აუცილებელია, რათა ჩვენმა ქვეყანამ დაიმკვიდროს ღირსეული ადგილი მსოფლიოს ქვეყნების თანამეგობრობაში.

მე არ მოვსულვარ დღეს აქ იმისთვის, რომ, სამწუხაროდ, როგორც ეს არაერთხელ მომხდარა ჩვენი ქვეყნის უახლოეს პოლიტიკურ ისტორიაში, მორიგი რაღაც ფუჭი დაპირებები გავცე, გითხრათ, ჩვენ აგვირჩიეთ და ერთი ჯოხის აქნევით, გავა ერთი, ორი, სამი წელი და ყველაფერი აყვავდება, ავფრინდებით და შემდეგ უიმე, არ გამომივიდა, მოდი, რა, ერთხელაც მოგვეცით ამის საშუალება, შემდეგ კიდევ ერთხელაც და მოგატყუოთ ჩვენს დაპირებებში. ეს არის ის, რისიც მე ყველაზე მეტად მეშინია, რაც ყველაზე მეტად არ მინდა, ჩემო ხალხო.

ჩვენი პოლიტიკური პოზიცია, ჩვენი საზოგადოებივი პოზიცია მდგომარეობს იმაში, რომ ჩვენ ყველას გეპატიჟებით ერთობლივ, მუხლჩაუხრელ შრომაში, ჩვენი ქვეყნის გადასარჩენად, რადგან ჩვენი ქვეყანა უმძიმეს მდგომარეობაშია იმ არასწორი იდეოლოგიისა და პოლიტიკური სისტემის წყალობით, რომელშიც ის მოექცა ბოლო წლებში", – აღნიშნა ლევან ვასაძემ.