ნამახვანჰესის საწინააღმდეგო აქციის მონაწილეები ფილარმონიისკენ გზის სავალი ნაწილის გადაკეტვის მიზნით მიემართებიან. ხვალ კი, მოძრაობის ერთ-ერთი ლიდერის, ვარლამ გოლეთიანის თქმით, პროტესტის მონაწილეები პირველი რესპუბლიკის მოედანზე 4 საათზე შეიკრიბებიან, რის შემდეგაც  რიონის ხეობაში დაბრუნდებიან და ჰესის მშენებლობაში კომპანიას ადგილზე შეუშლიან ხელს.

"ჩვენ გადავწყვიტეთ ასეთი რამ: სიტყვა ნათქვამია, პროცესი გამოაშკარავებულია, მათ შორის, დღევანდელი დასკვნითაც, რომელიც გასაჯაროვდა, მათ შორის, საერთაშორისო საზოგადოების შეფასებებითაც, ამიტომ გადავწყვიტეთ, რომ ხვალ ისევ ამ სცენიდან მივმართოთ ჩვენ დედაქალაქის მოსახლეობას და ყველა იმ ჩართულ ადამიანს, ვინც აქ მოდის და ვინც კიდევ შემოგვიერთდება მომავალში და ამის შემდეგ, უკვე, ჩვენ დავიძრათ ხეობაში კოლონით,... მივიდეთ იქ და ხელი შევუშალოთ უშუალოდ კომპანიის მუშაობას ხეობაში და არ მივცეთ საშუალება იმისა, რომ ახლა იმით ისარგებლონ, რომ ჩვენ აქ დისკომფორტი შევუქმნათ იგივე ჩვენ თანამემამულეებს და მათ გააგრძელონ ხეობის ნგრევა იქ", - განაცხადა გოლეთიანმა რესპუბლიკის მოედანზე სიტყვით გამოსვლისას.

დღეს მედიაგამოცემა მთის ამბებმა მოიპოვა იუსტიციის სამინისტროს დასკვნა, რომელიც უარყოფითად აფასებს ნამახვანჰესის ხელშეკრულებას.