ევროკავშირის სადამკვირვებლო მისიის ინფორმაციით, პოლონეთის რესპუბლიკის პრეზიდენტი ანჯეი დუდა, საქართველოში ევროკავშირის სადამკვირვებლო მისიასთან ერთად, სოფელ ოძისთან, სამხრეთ ოსეთის ადმინისტრაციული სასაზღვრო ხაზის მონაკვეთებთან იმყოფებოდა.

„ადგილზე ჩასვლის შემდეგ, ევროკავშირის სადამკვირვებლო მისიის ხელმძღვანელმა, ელჩმა მარეკ შჩიგელმა წარმოადგინა არსებული ვითარება გადაკვეთის კონტროლირებადი მთავარი პუნქტის რაიონში სამხრეთ ოსეთის ადმინისტრაციულ სასაზღვრო ხაზზე, რომელიც, დღევანდელი მდგომარეობით, რეგულარული მოძრაობისთვის დაკეტილია 2019 წლის სექტემბრიდან, 620 დღეზე მეტია.

მისიის ხელმძღვანელმა ხაზი გაუსვა უარყოფით გავლენას, რომელიც აქვს „ბორდერიზაციის“ ისეთ მოქმედებებს, როგორებიცაა ღობეების ან სათვალთვალო პოსტების დაყენება, ჰუმანიტარულ და ადამიანის უფლებების მდგომარეობაზე კონფლიქტით დაზარალებული ადგილობრივი მოსახლეობისთვის, მათ შორის, მათი გადაადგილების თავისუფლებაზე.

მისიის ხელმძღვანელმა ასევე ყურადღება გაამახვილა უარყოფით შედეგებზე, რომლებიც ოძისის გადაკვეთის კონტროლირებადი პუნქტის განგრძობად დახურვას აქვს კონფლიქტით დაზარალებულ მოსახლეობაზე, მათთვის სამედიცინო მომსახურებაზე, განათლებაზე ან სასოფლო-სამეურნეო მიწაზე და ადამიანის უფლებებზე წვდომის კუთხით“, – აღნიშნულია ევროკავშირის სადამკვირვებლო მისიის მიერ გავრცელებულ ინფორმაციაში.

მათივე ცნობით, პოლონეთის პრეზიდენტმა, ანჯეი დუდამ ისარგებლა შესაძლებლობით და მისიას საქართველოს მთელ ტერიტორიაზე სტაბილურობასა და ნდობის აღდგენაში შეტანილი წვლილისთვის მადლობა გადაუხადა. მან ასევე მადლიერება გამოხატა ინფორმაციული საველე ვიზიტისთვის და დაადასტურა პოლონეთის ურყევი მხარდაჭერა და დაფასება მისიის საქმიანობის მიმართ.

„მისიაში ამჟამად პოლონეთის ჩვიდმეტი მოქალაქე მსახურობს, მათ შორის ევროკავშირის სადამკვირვებლო მისიის ხელმძღვანელი და მცხეთის რეგიონალური ოფისის უფროსის მოადგილე.

მაღალი დონის ბოლო პოლონური ვიზიტები ევროკავშირის სადამკვირვებლო მისიაში შედგა 2017 წლის მაისში, როდესაც პრეზიდენტი დუდა ეწვია მისიის სათაო ოფისს და 2017 წლის ნოემბერში, როდესაც საგარეო საქმეთა მაშინდელი მინისტრი ვიტოლდ ვაშკიკოვსკი ეწვია ევროკავშირის სადამკვირვებლო მისიის მცხეთის რეგიონულ ოფისს“, – ნათქვამია ევროკავშირის სადამკვირვებლო მისიის მიერ გავრცელებულ ინფორმაციაში.