ნინოწმინდის ბავშვთა პანსიონის ყოფილი აღსაზრდელი ფორმულასთან საუბარში ამბობს, რომ დაახლოებით 10 წლის წინ, პანსიონში ერთერთ აღმზრდელს ცემის დროს 7 წლის ბიჭი შემოაკვდა.

"ეზოში ვიყავით ჩასულები და ამ დროს ერთი ბავშვი გაიქცა გოგოებისკენ, ბიჭი, იქნებოდა 6-7 წლის დაახლოებით. ამ აღმზრდელმა ჯერ სულ თმებით ათრია და გამოიყვანა გოგოებისგან, მერე იმ დონემდე მიიყვანა ბავშვი, იმ დონემდე სცემა, თვითონაც ვერ მიხვდა ალბათ, როგორ შემოაკვდა ხელში. ეს ფაქტიც კი გაუხსნელია. შემოვიდა იქ ერთი მანქანა, პოლიცია არ იყო, ამ ბავშვს გადააფარეს რაღაც პლიონკა და წაიყვანეს", - ამბობს პანსიონის ყოფილი ბენეფიციარი.

ახალგაზრდამ პანსიონში 15 წელი გაატარა. ის ამბობს, რომ აღსაზრდელების მიმართ აღმზრდელები დასჯის სასტიკ ფორმებს იყენებდნენ,.

"იყო ძალიან მძიმე ფაქტები ჩემთან და სხვებთან მიმართებით, იყო ბულინგი, ცემა რეიკებით, სახაზავებით, რაც ხელში მოყვებოდათ. [გვცემდნენ] აღმზრდელები, რომლებსაც ვითომ კაბა ეცვათ და ღმერთი სწამდათ სინამდვილეში კი იქ ჯოჯოხეთი ჰქონდათ დატრიალებული. ლოგინის რეიკებით, ხის სახაზავებით, თუ არ დავიძინებდით შუადღეზე რეიტუზებით აგვიკრავდნენ თვალებს და გვაძინებდნენ, თუ არ დავიძინებდით და მასწავლებლებს არ დავემორჩილებოდით, მათ თავს არ დავუხრიდით, გვათენებინებდნენ პურის მარცვლებზე და ბრინჯზე 24 საათით მუხლებით, კუთხეში", - ყვება ის.

ბენეფიციარის თქმით, ურჩ ბენეფიციარების მიმართ იყენებდნენ დამაძინებელი საშუალებებსაც. ამბობს, რომ ეს საკუთარ თავზეც გამოუცდია. ასევე იხსენებს იმასაც, თუ როგორ აბულინგებდნენ ჯანმრთელობის პრობლემის მქონე ბავშვებს.

"იყო ერთი ბავშვი, რომელსა აღმზრდელებმა თვითონ მოსიარულე ფსელი შეარქვეს. გენეტიკური დაავადება ჰქონდა ამ ბიჭს, ჩემი მეგობარი იყო. გახდა დასაცინი მასწავლებლებისგანაც და ბავშვებისგანაც. მასწავლებლებმა რომ დაიწყეს, ბავშვებიც აყვნენ", - ამბობს ის.

მისივე თქმთ, გაქცევა 90-ჯერ სცადა, თუმცა უშედეგოდ. ყოფილი ბენეფიციარი ასევე ამბობს, რომ მისი პანსიონში ცხოვრების დროს გაუპატიურების ფაქტები არ სმენია.

სახალხო დამცველი ნინოწმინდის ბავშვთა პანსიონთან დაკავშირებით აცხადებს, რომ  პროკურატურიდან ინფორმაცია გამოითხოვა, რომლითაც ირკვევა, რომ არასრულწლოვნების მიმართ სავარაუდო ძალადობის ფაქტზე 2016 წლიდან დაწყებულია გამოძიება. მათ შორის, გამოძიება გაუპატიურების ერთ ფაქტზე მიმდინარეობს.