პოლონელი ტურისტის დაჭრისთვის ბრალდებულს თბილისის საქალაქო სასამართლომ წინასწარი პატიმრობა შეუფარდა.

ტურისტი 5 ივლისს, თბილისში, ძალადობრივი და ჰომოფობიური აქციის პარალელურად დაჭრეს.

მედია იუწყებოდა, რომ ტურისტი საყურის გამო ცივი იარაღით დაჭრეს.

შინაგან საქმეთა სამინისტროს თანახმად, დაკავებული პირი უცხო ქვეყნის მოქალაქეს მოულოდნელად დაესხა თავს და ცივი იარაღით დაზიანება მიაყენა. განცხადებაში წერია, რომ “დაკავებულის ოჯახის წევრების განმარტებით, მას ფსიქიკური პრობლემები აღენიშნება”.

დაჭრილ პოლონელ ტურისტს დაუყოვნებლივ ჩაუტარდა ქირურგიული ოპერაცია და ის ამჟამად მძიმე, თუმცა სტაბილურ მდგომარეობაშია ალადაშვილის კლინიკაში.

ბრალდებული შემთხვევის ადგილზევე დააკავეს, დანაშაულის ჩადენის იარაღი – დანა კი ნივთმტკიცებად ამოიღეს. გამოძიება სისხლის სამართლის კოდექსის 19-108 მუხლით დაიწყო, რაც განზრახ მკვლელობის მცდელობას გულისხმობს.