ციციშვილის კლინიკაში სამი კოვიდინფიცირებული ჩვილი მართვით სუნთქვაზე იმყოფება. პირველადი მონაცემებით, სპეციფიკური PCR ტესტით ერთ მათგანს კორონავირუსის ინდური, ხოლო მეორეს - დელტა შტამი აქვს. მესამე ბავშვის პასუხი ჯერჯერობით ცნობილი არ არის. საბოლოო პასუხის მისაღებად ექიმები სეკვენირების შედეგს ელოდებიან. ორ თვემდე სამივე ინფიცირებულის მდგომარეობა კრიტიკულად მძიმეა.

ციციშვილის სახელობის ბავშვთა ახალი კლინიკის დირექტორმა, დავით რეხვიაშვილმა რუსთავი 2-ის ეთერში განაცხადა, რომ კლინკაში აქამდე ხელოვნურ სუნთქვაზე მცირე ასაკის ბავშვები არ ჰყოლიათ.

მისივე თქმით, ერთ-ერთი ჩვილი აფხაზეთიდან არის გადმოყვანილი, სწორედ ამიტომ გაუჩნდათ ეჭვი ინდურ შტამზე.

"შესაბამისად, ჩაერთო ამ სიტუაციაში საზოგადოებრივი ჯანდაცვა, გავგზავნეთ ნიმუში. სპეციფიკური PCR კვლევით დელტა შტამი დადასტურებულია, თუმცა სეკვენირება გაკეთებული არ არის.
კორონავირუსი დადასტურებულია ერთმნიშვნელოვნად, უბრალოდ, რომელი შტამია, ამის გასარკვევად გვაქვს გაგზავნილი კვლევაზე ნიმუში. პირველადი პასუხი სპეციფიკური PCR ტესტირებით დადგინდა, რომ ერთ პაციენტთან, აფხაზეთიდან გადმოყვანილ ჩვილთან არის დელტა ვირუსი, ხოლო მეორე პაციენტთან - ბრიტანული შტამია, მაგრამ საბოლოო პასუხი მიიღება სეკვენირებით და ამას სჭირდება დრო," - ამბობს დავით რეხვიაშვილი.