ჰაიტის ხელისუფლებამ, პრეზიდენტ ჟოვენელ მოიზის მკვლელობის შემდეგ, შეერთებულ შტატებს ქვეყანაში ჯარების შეყვანის თხოვნით მიმართა.

იგივე თხოვნით ჰაიტმა გაეროსაც მიმართა. გაეროს განცხადებით, ჰაიტის მოთხოვნას შეისწავლიან და დასძენენ, რომ საკითხის გადასაწყვეტად უშიშროების საბჭო უნდა შეიკრიბოს.

პრეზიდენტის მკვლელობის შემდეგ, ქვეყანაში ვითარება კრიტიკულად დაიძაბა. ამას თან ერთვის, კრიმინოგენული სიტუაცია, პოლიტიკური კრიზისი, უკიდურესი სიღარიბე, კორონავირუსით გამოწვეული კრიზისი.

მანამდე, შეერთებული შტატების პრეზიდენტმა ჯო ბაიდენმა და სახელმწიფო მდივანმა ენტონი ბლინკენა ჰაიტის დახმარება აღუთქვეს.

თეთრი სახლის პრესმდივანმა, ჯენ ფსაკიმ განაცხადა, რომ ვაშინგტონი პორტ-ო-პრენსში FBI-ისა და ეროვნული უსაფრთხოების დეპარტამენტის წარმომადგენლებს გაგზავნის, რათა დაადგინონ რა დახმარების აღმოჩენა შეიძლება ჰაიტისთვის.

ჰაიტის პრეზიდენტი ჟოვენელ მოიზი ოთხშაბათს ღამით, თავის სახლში მოკლეს. თავდასხმის შედეგად მძიმედ დაშავდა მისი ცოლი, რომელიც მაიამის საავადმყოფოში გადაიყვანეს.

მკვლელობის შემდეგ, ქვეყანაში საგანგებო მდგომარეობა გამოცხადდა, დაიხურა საერთაშორისო აეროპორტი და საზღვრები.

ჰაიტის ხელისუფლების განცხადებით, პრეზიდენტის მკვლელობაში მონაწილეობდა 26 კოლუმბიელი და 2 წარმოშობით ჰაიტელი აშშ-ის მოქალაქე.