ქვეყანას მომავალი არ აქვს ამ ხელისუფლების ხელში. ქვეყანას, სადაც ჟურნალისტებს მუშაობის საშუალება არ აქვს, ქვეყანას, სადაც ჟურნალისტებს მუშაობის დროს ხოცავენ, - განაცხადა ჟურნალისტმა ეკა მიშველაძემ საპროტესტო აქციაზე , რომელიც 5 ივლისს სასტიკად ნაცემი ტვ პირველის ოპერატორის, ლექსო ლაშქარავას გარდაცვალების შემდეგ იმართება.

"ქვეყანას მომავალი არ აქვს ამ ხელისუფლების ხელში. ქვეყანას, სადაც ჟურნალისტებს მუშაობის საშუალება არ აქვს, ქვეყანას, სადაც ჟურნალისტებს მუშაობის დროს ხოცავენ. და ლექსო მოკლეს.

და არანაირ პრესკონფერენციას, არანაირ ექსპერტიზას აზრი არ აქვს.

თქვენსას არაფერს არ გავაშუქებთ, იმიტომ რომ თქვენი ტყუილები უნდა დასრულდეს. და ახლა გაჩვენებთ, როგორია მედიის ძალა. ახლა გაჩვენებთ იმას, რაც ვერავინ გააკეთა 9 წლის განმავლობაში. ამას ჩვენ გავაკეთებთ. მედია გააკეთებს. გაჩვენებთ, როგორია გაბრაზებული მედია. მედია, რომელიც გიფრთხილდებოდათ, რომელიც ეთერში გიწვევდათ და თქვენ არ მოდიოდით. თქვენგან წიხლის გარდა არაფერი მიგვიღია. და საბოლოოდ მივიღეთ ის, რომ მოკალით 36 წლის უდანაშაულო ბიჭი. ამას ვერ გაამართლებთ, უნდა წახვიდეთ, უნდა დამთავრდეთ, უნდა დასრულდეს. ღარიბაშვილო, უნდა გეყოს ძალა. თუ გინდა, გქონდეს მომავალი, წადი. წაიყვანე შენი მარიონეტები, ბიძინა ივანიშვილო.

და სამღვდელოებავ, ისინი, ვინც მოუწოდებდით ძალადობისკენ, თქვენ არ გაქვთ უფლება, ილაპარაკოთ ღმერთის სახელით. გაიკრიჭეთ წვერი და თქვენც წადით, არც გამოხვიდეთ, არც იქადაგოთ. იმიტომ, რომ სამარცხვინოები ხართ", - თქვა მიშველაძემ.

რუსთაველის გამზირზე, პარლამენტის წინ საპროტესტო აქცია მიმდინარეობს. აქციის მონაწილეები 5 ივლისს მოძალადეების მიერ სასტიკად ნაცემი ტვ პირველის ოპერატორის, ლექსო ლაშქარავას გარდაცვალების შემდეგ პრემიერ მინისტრ ირაკლი ღარიბაშვილის გადადგომასა და დასჯას მოითხოვენ.