ერაყში კორონავირუსით ინფიცირებულთა საავადმყოფოში გაჩენილი ხანძრის შედეგად 54 ადამიანი დაიღუპა. შემთხვევა ქალაქ ენ ნასირიაში მოხდა.

მანამდე ვრცელდებოდა ინფორმაცია 38 დაღუპულის შესახებ.

პირველადი ინფორმაციით, იმამ ჰუსეინის კლინიკაში ხანძარი ჟანგბადის ბალონის აფეთქებას მოჰყვა. მეხანძრე-მაშველებმა ცეცხლის ლოკალიზება მოახერხეს, თუმცა ბლოკირებულ კლინიკაში დარჩენილი რამდენიმე პაციენტის გამოყვანა ამ დრომდე ვერ ხერხდება.

ადგილობრივი მედიის ცნობით, ქვეყნის პრემიერ მინისტრი ალ ქაზიმი ტრაგედიის ადგილზე უკვე ჩავიდა. დი ქარის პროვინციის ჯანდაცვის დეპარტამენტმა საგანგებო მდგომარეობა გამოაცხადა.

ამ დღეებში ერაყის სამხრეთით ანომალიური სიცხეები მძვინვარებს. დღის განმავლობაში ჰაერის ტემპერატურა 50 გრადუსს აჭარბებს.

ეს, ერაყში კოვიდკლინიკაში ხანძრის გაჩენის პირველი შემთხვევა არ არის. აპრილის ბოლოს ბაღდადის ერთ-ერთ საავადმყოფოში ხანძარს 82 ადამიანი ემსხვერპლა.