საქართველოში 12 წლის ზემოთ ბავშვების ვაქცინაცია იგეგმება. ამის შესახებ დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ მთავრობის ადმინისტრაციაში გამართულ ბრიფინგზე განაცხადა.

ამასთან, პაატა იმნაძის განცხადებით, საქართველოში უკვე იყო ერთი პრეცედენტი, როდესაც 12 წლის ბავშვი აიცრა. მისივე თქმით, აღნიშნულ ბავშვს სპეციალური ჩვენება ჰქონდა და ამიტომაც აიცრა.

როგორც იმნაძე განმარტავს, საქართველო ჯანმრთელობის მსოფლიო ორგანიზაციის გადაწყვეტილებას მოელის, რათა ვაქცინაციის ასაკობრივი ზღვარი დაბლა დასწიოს.

"ბავშვებთან დაკავშირებით "ფაიზერს" უწერია ახალ ინსტრუქციაში, რომ 12 წლიდან შესაძლებელია აცრა. ამავე დროს რამდენიმე ქვეყანამ უკვე მიიღო ეს ოფიციალურად. ჩვენ ველოდებით ჯანმრთელობის მსოფლიო ორგანიზაციის ოფიციალურ გადაწყვეტილებას იმის შესახებ, რომ 12 წლიდან დაშვებული იქნება აცრები. როგორც კი, ეს იქნება ჯანმრთელობის მსოფლიო ორგანიზაციიდან, რა თქმა უნდა, ჩვენთანაც დავწევთ შესაბამის ვაქცინებზე ასაკს. თუმცა, საქართველოში უკვე იყო ერთი პრეცედენტი, როდესაც 12 წლის ბავშვი აიცრა, სპეციალური ჩვენება ჰქონდა ამ ბავშვს, ამიტომ ეს ბავშვი აიცრა", - განაცხადა პაატა იმნაძემ.

ამ დროისთვის, საქართველოში "ფაიზერის" პრეპარატით ვაქცინაცია 16 წლიდან არის შესაძლებელი.