შეერთებული შტატები შეშფოთებას გამოთქვამს ავღანეთის ახალი, დროებითი მთავრობის შემადგენლობის გამო, რომელიც "თალიბანმა" 7 სექტემბერს წარადგინა.

ვაშინგტონის შეშფოთება უკავშირდება მთავრობის წევრებს, რომლებიც დაკავშირებულნი არიან ამერიკელ სამხედროებზე თავდასხმებთან. ასევე, დაგმობილია მთავრობაში მხოლოდ მამაკაცების მონაწილეობა.

"დროებითი მთავრობა, მხოლოდ იმ ადამიანებისგან შედგება, რომლებიც ან "თალიბანის" წევრები, ან მათთან დაკავშირებული პირები არიან. ამასთან, კაბინეტში არცერთი ქალი არ არის", - ნათქვამია სახელმწიფო დეპარტამენტის მიერ გავრცელებულ განცხადებაში.

მანამდე "თალიბანი" ირწმუნებოდა, რომ ინკლუზიური მთავრობის შექმნას ესწრაფვოდა, სადაც მხოლოდ მათი დაჯგუფების წევრები არ იქნებოდნენ წარმოდგენილნი.

სახელმწიფო დეპარტამენტი აღნიშნავს, რომ ვაშინგტონი "თალიბანს" მისი ქმედებების და არა განცხადებების მიხედვით განსჯის.

"კიდევ ერთხელ ხაზგასმით აღვნიშნავთ ჩვენს მოლოდინს, "თალიბანმა" უნდა უზრუნველყოს, რომ ავღანეთის ტერიტორია არავინ გამოიყენოს სხვა ქვეყნისთვის საფრთხის შესაქმნელად. მსოფლიო ყურადღებით აკვირდება მოვლენათა განვითარებას", - აღნიშნულია განცხადებაში.

გუშინ ცნობილი გახდა, რომ ავღანეთის დროებით მთავრობას უხელმძღვანელებს გაეროს სანქცირებულთა სიაში მყოფი, "თალიბანის" ერთ-ერთი ლიდერი მოლა მოჰამედ ჰასან ახუნდი, ხოლო შინაგან საქმეთა მინისტრის პოსტს შეერთებული შტატების გამოძიების ფედერალური ბიუროს მიერ ძებნილი სირაჯუდინ ჰაყანი ჩაიბარებს.