ახალციხისა და კუმურდოს ეპისკოპოსი, მეუფე ნიკოლოზი, არ გამორიცხავს, რომ მას უსმენენ. ტვ პირველთან საუბრისას ის არ ადასტურებს ინტერნეტში გავრცელებულ ინფორმაციას, რომ მას რუსეთიდან დიდი რაოდენობით თანხა გადაურიცხეს.

 "პირადად არ ვიცი, მისმენენ თუ არა, მაგრამ ცოტა ხნის წინ ერთ-ერთმა ადამიანმა გამაფრთხილა, რომ მისმენდნენ, ყველას უსმენენ, მათ შორის ჟურნალისტებსაც, მე მოსმენაში პრობლემას ვერ ვხედვა, პრობლემა გასაჯაროვებაშია, თუ კანონით არ აქვთ მოსმენის უფლება, მაშინ ძალიან ცუდია, თუ მისმენენ. ეს მანკიერი პრაქტიკა წინა ხელისუფლებაშიც იყო, ახლაც არის და მომავალშიც იქნება. ეს არის უზნეობა და უმსგავსობა, ყოვლად დაუშვებელი.

ერთხელ პატრიარქს მიუტანეს ტელეფონი და უთხრეს, რომ ის არ ისმინებოდა. პატრიარქმა უარი განაცხადა: რად მინდა ისეთი ტელეფონი, რომელიც არ ისმინებაო. ეს ჰიპოტეტურია.

 მე თუ ვინმე დამირეკავს, წინასწარ გავაფრთხილებ, რომ ტელეფონი ისმინება. თქვენ შეგიძლიათ, შეამოწმოთ ჩემი ანგარიში, შემიძლია გითხრათ, რომ რუსეთიდან ჩემს ანგარიშზე ფულის გადარიცხვა შეუძლებელია" - განუცხადა ტვ პირველს მეუფე ნიკოლოზმა.

ინტერნეტში გუშინ გავრცელდა ფაილები, სადაც, სავარაუდოდ რუსეთის სასარგებლოდ მეუფეს ჯაშუშობაზეა საუბარი.

ტვ პირველის ცნობით, გავრცელებულ ფაილებში, წერია, რომ მეუფე ნიკოლოზი რუსეთის მოქალაქეს ინფორმაციას ფულის სანაცვლოდ აწვდიდა. 

თუ ფაილების ავთენტურობა დადასტურდება, გამოდის, რომ ქვეყანაში უსმენენ სინოდის წევრებს, პატრიარქის მოსაყდრეს, მღვდელმთავრებს, პატრიარქის თანაშემწეებს, ეპისკოპოსებს, მონაზვნებს და მათთან დაკავშირებულ პირებს.

სავარაუდოდ, სუს-ის მოერ მომზადებულ საიდუმლო ანგარიშებში, მათ შორის, საუბარია საპატრიარქოს წარმომადგენლების შესაძლო რუსულ კავშირებზე.

ფაილებში თავმოყრილია ინფორმაცია მაღალიერარქების და საპატრიარქოს თანამშრომლების კავშირების შესახებ რუსეთთან. ზოგიერთი მათგანი მოიცავს პირად ინფორმაციას, ასევე, საუბარია სასულიერო პირების კანონიერ ან უკანონო ბიზნესებზე რუსეთში.