ქართველმა მოჭადრაკემ ნონა გაფრინდაშვილმა „ნეთფლიქსს“ კალიფორნიის სასამართლოში უჩივლა. ამის შესახებ ამერიკული გამოცემა „ნიუ-იორკ თაიმსი“ იუწყება.

„ნონა გაფრინდაშვილმა, ჭადრაკის ისტორიულმა ჩემპიონმა, „ნეთფლიქსს“ უჩივლა სერიალში გაჟღერებული ფრაზის გამო, სადაც მის სახელს ახსენებენ და ამბობენ, რომ ის მამაკაცებს არასდროს დაპირისპირებია. სინამდვილეში ის მათ ხშირად უპირისპირდებოდა“, - წერს გამოცემა.

სარჩელში ნათქვამია, რომ სერიალ „ლაზიერის გამბიტის“ ეპიზოდი 1968 წელს განვითარებულ მოვლენებს აღწერს, რა დროსაც გაფრინდაშვილს უკვე ჰქონდა ნათამაშები 50-ზე მეტ მამაკაც მოჭადრაკესთან.

სარჩელში აღნიშნულია, რომ „ნეთფლიქსმა“ განზრახ იცრუა, რითიც ეპიზოდისთვის დრამატულობა შეემატებინა, რომ სერიალის გმირმა შეძლო გაეკეთებინა ის, რისთვისაც არცერთ ქალს არასდროს მიუღწევია, მათ შორის გაფრინდაშვილს

სარჩელში ასევე ხაზგასმულია, რომ გაფრინდაშვილს „ნეთფლიქსმა“ დამატებითი შეურაცხყოფა მიაყენა, რადგან ის ფილმში წარმოდგენილია, როგორც რუსი მოჭადრაკე. ეს იმ ფონზე, როცა ნონა გაფრინდაშვილი საქართველოდანაა, ქვეყნიდან, რომელიც დღემდე იცავს თავს რუსეთის აგრესიისგან.

ნონა გაფრინდაშვილის ადვოკატები „ნეთფლიქსისგან“ ზარალის ასანაზღაურებლად სულ მცირე ხუთ მილიონ დოლარს ითხოვენ.