დაავადებთა კონტროლისა და საზოგადოებრივი ჯანმრთელობის ეროვნული ცენტრის დირექტორი ამირან გამყრელიძე სარეკლამო კომპანია "ალმასგან" ვაქცინაციის მხარდამჭერი ბანერების დაუყოვნებლივ აღდგენას მოითხოვს. ამის შესახებ გამყრელიძემ სოციალური ქსელით გავრცელებულ ვიდეოში განაცხადა, სადაც მან კომპანიისადმი წარგზავნილი წერილის შინაარსი გააცნო საზოგადოებას.

ამირან გამყრელიძის განცხადებით, ვაქცინაციის ბანერების ჩანაცვლების შესახებ ინფორმირებული არ იყვნენ.

"პანდემიის პირობებში, როდესაც ყოველდღიურად, სამწუხაროდ, ათასობით ადამიანი ავადდება და ათეულობით კი იღუპება ამ ვერაგი დაავადებით. ამავდროულად ვაქცინაციის პროცესს კლებადი ტენდენცია აქვს უკანასკნელი დღეების განმავლობაში, საკმაოდ ნეგატიური შედეგი ექნება ვაქცინაციის მხარდამჭერი ბანერის ნებისმიერი სხვა შინაარსის ბანერით ჩანაცვლებას. ამასთანავე, ჩვენ შორის არსებული სახელშეკრულებო პრაქტიკის მიხედვითაც ბანერების განთავსების ლოკაციის ცვლილებაც შესაძლებელია მხოლოდ მხარეთა წინასწარი შეთანხმებით, რაც ამ კონკრეტულ შემთხვევაში არ მომხდარა.

ბანერების შეცვლის თაობაზე ინფორმაციის წინასწარ ქონის შემთხვევაში ეროვნული ცენტრი ყველა შესაძლო საშუალებას გამოიყენებდა, რათა უპირობოდ გაგრძელებულიყო ბანერების განთავსების ყველა საჭირო ღონისძიება და მომხდარიყო ვაქცინაციის პოპულარიზაცია მოსახლეობის სიცოცხლის გადასარჩენად.

აღნშინულის გათვალისწინებით მოგიწოდებთ, უზრუნველყოთ გარე ბილდბორდებზე COVID-19-ის საწინააღმდეგო ვაქცინაციის მხარდამჭერი შინაარსის შემცველი ბანერების დაუყოვნებლივ აღდგენა, ვინაიდან პანდემიის პერიოდში, სწორედ, იმუნიზაცია არის პანდემიის დასრულების რეალური საშუალება", - განაცხადა ამირან გამყრელიძემ.

შეგახსენებთ, თბილისში 17 სექტემბერს, გვიან ღამით გამოჩნდა ბანერები წარწერით "არა ნაცებს! არა ბოროტებას! არა ღალატს!", სადაც გამოსახულები არიან გუბაზ სანიკიძე, ნიკა მელია, ნოდარ მელაძე, ზურაბ ჯაფარიძე, მიხეილ სააკაშვილი, ნიკა გვარამია, გიორგი გახარია.

დაავადებათა კონტროლის ეროვნული ცენტრი ბანერების საკითხს განცხადებით გამოეხმაურა, სადაც აღნიშნულია, რომ უწყება ფაქტს გმობს.