"ქართული ოცნების" თავმჯდომარე, ირაკლი კობახიძე დმანისში მომხდარ ინციდენტს ეხმიანება და ამბობს, რომ თვითონ პასუხისმგებლობის არ აიღებს, რადგან მისი თქმით, "დეგენერატმა კაცმა ვიღაც კაცი დაჭრა."

მან ჟურნალისტებს უთხრა, რომ პასუხისმგებლობა უნდა აიღონ ტელევიზიებმა, საიდანაც ძალადობა, ბოროტება და უბედურება "გადმოედინება."

"რაც მოხდა დმანისში აბსოლუტურად გაუმართლებელი და მიუღებელია. რაც შეეხება პასუხისმგებლობას, ეს არის კონკრეტული პირების პასუხისმგებლობა, ვინც მონაწილეობდა... როდესაც ადგილი აქვს ექსცესს და ეს ინციდენტი იყო ექსცესი, ასეთ დროს ეს არის კონკრეტული პირის პასუხისმგებლობა. ეს არის პირველი შემთხვევა ამ სამთვიანი საარჩევნო კამპანიის პერიოდში. მე რა პასუხისმგებლობა უნდა ავიღო? კაცმა დაჭრა, დეგენერატმა ვიღაც კაცი. რა პასუხისმგებლობა უნდა ავიღო ამაზე? პასუხისმგებლობა უნდა აიღოთ თქვენ, იმ მუდმივ ძალადობაზე, ბოროტებაზე, და უბედურებაზე - რაც ყოველდღიურად გადმოედინება თქვენი არხებიდან. პასუხისმგებლობა უნდა აიღოს თქვენმა ბინძურმა ტელევიზიებმა, - თქვა კობახიძემ.

სოფელ განთიადში ენმ-ს დმანისის მერობის კანდიდატის წინასაარჩევნო შეხვედრაზე ოპოზიციის ორი აქტივისტი დანით დაჭრეს.