თელავის ცენტრალური საავადმყოფოს დირექტორის ზურაბ საჩიშვილის მკვლელობის ბრალდებით დაკავებულ ყოფილ პოლიციელს ვანო ზანდარაშვილს 12-წლიანი პატიმრობა მიესაჯა.

10 საათიანი მსჯელობის შემდეგ, 11-იდან 8 ნაფიცმა მსაჯულმა ვანო ზანდარაშვილი დამნაშავედ ცნო.

ნაფიცმა მსაჯულებმა არ გაიზიარეს, ბრალდებულ ვანო ზანდარაშვილის ადვოკატის პოზიცია, რომელიც ამტკიცებდა, რომ ყოფილმა პოლიციელმა მკვლელობა აფექტურ მდგომარეობაში ჩაიდინა.

შემთხვევა 2020 წლის 25 დეკემბერს მოხდა. პროკურატურის ცნობით, 25 დეკემბერს, ღამის საათებში თელავის რაიონის სოფელ იყალთოს ცენტრში შსს-ს თელავის რაიონული სამმართველოს მფლობელობაში არსებულ მანქანაში ვანო ზანდარაშვილსა და ექიმ ზურაბ საჩიშვილს შორის ურთიერთშელაპარაკება მოხდა. უწყების ინფორმაციით, შელაპარაკების ფონზე ვანო ზანდარაშვილმა, შურისძიების მოტივით, განზრახ მოკვლის მიზნით, მის სახელზე გაპიროვნებული სამსახურებრივი-საშტატო ცეცხლსასროლი იარაღიდან ზურაბ საჩიშვილს ახლო მანძილიდან დამიზნებით რამდენჯერმე ესროლა. ზურაბ საჩიშვილი ადგილზე გარდაიცვალა.

ასევე ზანარაშვილის  მიერ სროლის შედეგად, დაიჭრა ავტომობილში მჯდომი ორი პირი. 26 დეკემბერს დააკავეს.