სამწუხაროა, რომ არ აირჩია სარფიდან შემოსვლა, იქ კიდევ უფრო კარგად დავხვდებოდით, - ასე ეხმიანება აჭარის მთავრობის თავმჯდომარე თორნიკე რიჟვაძე მიხეილ სააკაშვილის განცხადებას, საქართველოში 2 ოქტომბრის საღამოს დაბრუნების თაობაზე.

მისი თქმით, სააკაშვილს საქართველოში ციხე მოელის.

"ეს არის წინასაარჩევნო ბლეფი და ამ სუბიექტს არასდროს არ ჰყოფნიდა არც ვაჟკაცობა, არც გამბედაობა, რომ ჩამოსულიყო. თუმცა, თუ საოცრება მოხდა, როგორც უკვე დავპირდით, ის პირდაპირ მოხვდება ქართულ ციხეში. სამწუხაროა, რომ არ აირჩია სარფიდან შემოსვლა, იქ კიდევ უფრო კარგად დავხვდებოდით. თქვენ იცით, რომ პენიტენციურ დაწესებულებებში ვაქცინაციასაც ძალიან აქტიურად ვახორციელებთ. როგორც ვიცი, მეორე აცრა სჭირდება და აიცრება კიდეც", - აღნიშნა თორნიკე რიჟვაძემ.

შეგახსენებთ, 27 სექტემბერს მიხეილ სააკაშვილმა განაცხადა, რომ 2 ოქტომბრის საღამოსთვის საქართველოში დასაბრუნებელი ავიაბილეთი აიღო და ჯავშნის ფოტო გამოაქვეყნა.