ყველა ხელისუფლება დამარცხდა ქართულ მედიასთან, დამარცხდება ივანიშვილის რეჟიმიც - ასე ეხმიანება ჟურნალისტი ვახო სანაია დავით კეზერაშვილის წინააღმდეგ თავდაცვის სამინისტროს მიერ სარჩელის სასამართლოში შეტანას.

ვახო სანაიას განცხადებით, ქართული მედია არის დაუმარცხებელი.

"ახლა ვდგავართ ამ შენობის მე-17 სართულზე. მახსენდება 2001 წელი, როცა აქ, ამ დერეფანში შემოვიდა უშიშროების სამსახური და აქაა ნანა, რომელიც ბევრი წელი მუშაობდა რუსთავი 2-ში, ყველას ახსოვს ეს. მახსენდება იმედი და რა მოხდა 2007 წელს. ვხედავ ნინოს - რა მოხდა მაესტროსთან დაკავშირებით. ვხედავთ ქეთის, ირაკლის, გიორგის, ზუკას, მიშას - რუსთავი 2-თან დაკავშირებით, რომელიც ხელისუფლებამ წაიღო, მაგრამ სამი არხი მიიღო.

თქვენი დაქვემდებარებული სასამართლოების, სტრუქტურების საშუალებით, რაც უნდა გააკეთოთ - არ დავდებთ კალამს, კამერებს, არ დავდგებით მუხლებზე, ქართული მედია არის დაუმარცხებელი.

შემთხვევით არ ჩამომითვლია ყველა ხელისუფლების დროინდელი საქმეები - ყველა ხელისუფლება დამარცხდა ქართულ მედიასთან, დამარცხდება ივანიშვილის რეჟიმიც. ჩვენ გაჩვენებთ ეგზიტპოლის შედეგებს საღამო რვა საათზე, გაჩვენებთ იმას, რა გადაწყვეტილებას მიიღებს ქართველი ხალხი და ავსახავთ იმ რეალობას, რასაც ყუთში ჩააგდებს ამ ქვეყნის მოსახლეობა", - თქვა ვახო სანაიამ.

დავით კეზერაშვილის წინააღმდეგ თავდაცვის სამინისტროს სარჩელს ტელეკომპანია "ფორმულა" საგანგებო ბრიფინგით გამოეხმაურა.

შეგახსენებთ, თავდაცვის სამინისტროს დავით კეზერაშვილის წინააღმდეგ სარჩელი შეაქვს.