იმისათვის, რომ სპეცოპერაციამ მიაღწიოს თავის მიზანს, კონფიდენციალობა უნდა იყოს დაცული მაღალი ხარისხით,   - განაცხადა მედიასთან თემის კომენტირებისას „ქართული ოცნების“ თავმჯდომარემ, ირაკლი კობახიძემ.


მისი თქმით, მიხეილ სააკაშვილის დაკავების სპეცოპერაციის წარმატების ერთ-ერთი საფუძველი გახდა სწორედ ის, რომ სათანადოდ იყო დაცული ეს კონფიდენციალობა.

"ის, რომ წარმატებით წარიმართა სპეცოპერაცია, მეტყველებს იმაზე, რომ ყველაფერი სათანადოდ იყო დაგეგმილი.

მიხეილ სააკაშვილს რაც შეეხება, რა თქმა უნდა, როდესაც ადამიანი ხვდება ციხეში, ეს თავისთავად, არის მძიმე მოვლენა, მაგრამ ერთი რამ უნდა აღინიშნოს, მიხეილ სააკაშვილი არის ადამიანი, რომელმაც ეს ქვეყანა 18 წელია, არ დაასვენა. ჯერ ცხრა წელი, როდესაც იყო ხელისუფლებაში და თქვენ გახსოვთ მის მიერ ჩადენილი დანაშაულები, მისი რეჟიმის მიერ ჩადენილი დანაშაულები, შემდეგ ცხრა წელი ოპოზიციაში მან ქვეყანა არ დაასვენა და ახლაც იგივეთი ემუქრებოდა ქვეყანას. ის ჩამოდიოდა საქართველოში იმისათვის, რომ შეესრულებინა თავისი მუქარა ხელისუფლების გადატრიალებასა და ქვეყნის არევასთან დაკავშირებით. შესაბამისად, სამართალდამცავმა ორგანოებმა მიიღეს ყველა ზომა, რომ მისი ახალი დანაშაული აღეკვეთათ“, – განაცხადა ირაკლი კობახიძემ.