ის მზად არის რომ ნებისმიერი ტესტი ჩაიტაროს, - ამის შესახებ რუსთავის მე-12 სასჯელაღსრულების დაწესებულების დატოვების შემდეგ მიხეილ სააკაშვილის ადვოკატმა ნიკა გვარამიამ მასთან შეხვედრის შემდეგ ისაუბრა. მისი თქმით, არ უპასუხებდა "მიშას ადგილზე ღარიბაშვილს, მაგრამ ეს მისი გადაწყვეტილებაა".

მისივე თქმით, მიხეილ სააკაშვილი შიმშილობას განაგრძობს და მისი ჯანმრთელობის მდგომარეობა, ამ დროისთვის დამაკმაყოფილებელია.

 "ვიმედოვნებთ, რომ ძალიან მალე მოგვარდება ტელევიზორთან დაკავშირებული პრობლემა. ყოველშემთხვევაში, ეს პირობა ჩვენ მივიღეთ. რაც შეეხება მის მდგომარეობას, ძაან დიდი ხანია მე ასეთი სააკაშვილი არ მინახავს, გულწრფელად გეტყვით. მისი მთავრობის წევრი ვიყავი და როცა პიკზე იყო თავისი აქტივობების და პოზიტიური რეფორმატორული აქტივობების, მას მერე არასოდეს მინახავს მიხეილ სააკაშვილი ასეთი მხნე. არაფერი ეტყობა შიმშილობის. იმ თვალსაზრისით, რომ ნამდვილად შიმშილობს, ჯერჯერობით, ჯანმრთელობის მხრივ ძალიან ნორმალურად არის, თუმცა, ცხადია, რომ უახლოეს დღეებში ჯანმრთელობის მდგომარეობა დაიწყებს გაუარესებას. ბუნებრივია, იგი არ აპირებს შიმშილობის შეწყვეტას და შესაბამისად, სამედიცინო ადმინისტრირებაზეც უარი აქვს ნათქვამი, - ამბობს ნიკა გვარამია.

დღეს, ირაკლი ღარიბაშვილმა წერილი გამოქვეყნა, სადაც აღნიშნავს, რომ სააკაშვილი საქართველოში არა ციხეში შესვლის გათვლით, არამედ ხელისუფლების გადატრიალების მყარი იმედით ჩამოვიდა. ღარიბაშვილმა ყოფილი პრეზიდენტის ნარკოდამოკიდებულებაზეც ისაუბრა.