ბათუმში, კორპუსის ჩამონგრევის ადგილზე დროებით შეჩერდა სამძებრო სამუშაოები. ამის შესახებ შინაგან საქმეთა მინისტრმა, ვახტანგ გომელაურმა განაცხადა.

ცოტა ხნის წინ, მრავალსართულიანი კორპუსის ნანგრევებში, კიდევ ერთი კაცი ს ცხედარ იპოვეს.

„რაღაც დროის განმავლობაში, ვაჩერებთ სამუშაოებს, რათა მშენებლებმა მოგვცენნ ნებართვა, რათა სამუშაოებმა ნგრევა არ გამოიწვიოს და კორპუსის მეორე ნაწილი არ ჩამოწვეს. სავარაუდოდ, ქუჩა გადაიკეტება, რათა ხალხმა არ იმოძრაოს. უკანა ეზოში მოეწყობა ბარიერები, რათა ხალხი ამ ზონაში არ შევიდეს, რამაც, შეიძლება, საფრთხე გამოიწვიოს. მშენებლები შეიკრიბებიან მერიაში და იმსჯელებენ“, - აღნიშნა ვახტანგ გომელაურმა.

შეგახსენებთ, გუშინ, ბათუმში საცხოვრებელი კორპუსის ნაწილი მთლიანად ჩამოინგრა. თავდაპირველი ინფორმაციით, ნანგრევებში 10-დან 15-მდე ადამიანი მოყვა.

კორპუსის ჩამონგრევას 9 ადამიანის სიცოცხლე ემსხვერპლა, მათ შორის 3 ბავშვია. 7 ადამიანის ცხედარი გვიან ღამით მაშველებმა ნანგრევებიდან ამოასვენეს. ნანგრევებიდან ამოყვანილი ერთი ქალი, რომელიც ჯერ კიდევ ცოცხალი იყო, დღეს დილით კლინიკაში გარდაიცვალა. ერთი ადამიანი იმყოფება კლინიკაში, 36 წლამდე კაცი, რომლის მდგომარეობაც მძიმეა.

შინაგან საქმეთა სამინისტრომ ბათუმში საცხოვრებელი კორპუსის ნგრევის ფაქტზე მიმდინარე გამოძიების ფარგლებში სამი პირი დააკავა. დაკავებულთაგან ერთ-ერთი პირველი სართულზე მდებარე ბინის მესაკუთრეა.