გერმანიაში დაიწყო გამოძიება ბელარუსის ტერიტორიიდან პოლონეთის გავლით გერმანიაში მიგრანტების კონტრაბანდაში ბელარუსის პრეზიდენტ ალექსანდრ ლუკაშენკას შესაძლო მონაწილეობასთან დაკავშირებით. ამის შესახებ გაზეთი Bild am Sonntag წყაროზე დაყრდნობით წერს.  

გერმანიის ფედერალური პოლიციის თანახმად, 2021 წლის აგვისტოდან ბელარუსის მხრიდან გერმანიაში უკანონოდ მოხვდა 4 ათასამდე უცხოელი.

გამოცემის ცნობით, გერმანიის საზღვრის უკანონოდ გადაკვეთას ცდილობენ ერაყელი და სირიელი ახალგაზრდა მამაკაცები. როგორც წესი, ევროპის მიმართულებით გაგზავნის პუნქტები მოქმედებენ ბაღდადში, ერბილში, დუბაიში, ბეირუთში, ამანში, სტამბოლში და დამასკოში. ამასთან, ევროპაში წასვლის მსურველებს ბელარუსის სტუდენტურ ვიზებს აძლევენ.

მინსკში ჩასვლის შემდეგ მესაზღვრეებს ან მილიციის წარმომადგენლებს ისინი პოლონეთის საზღვართან გადაჰყავთ. ევროკავშირის ტერიტორიაზე მოხვედრის შემდეგ არალეგალი მიგრანტები დამოუკიდებლად აგრძელებენ გერმანიის მიმართულებით გადაადგილებას.

8 ოქტომბერს ევროკავშირის 12 წევრი ქვეყნის შს მინისტრმა, მათ შორის პოლონეთმაც,  ევროკომისიას მიმართა თხოვნით, მიიღონ დამატებითი და ადეკვატური დაფინანსება საზღვრებზე ზღუდეების ასაგებად, რათა შემცირდეს არალეგალი მიგრანტების ნაკადი.