ახალქალაქისა და კუმურდოს ეპარქიის მიტროპოლიტმა, ნიკოლოზ ფაჩუაშვილმა ხელი მოაწერა სააკაშვილის გათავისუფლების მოთხოვნის პეტიციას. ამის შესახებ ის ტვ პირველს ესაუბრა.

"მე ვფიქრობ, რომ ქვეყნისთვის ცუდია, როდესაც ყოფილი პრეზიდენტი ციხეში ზის. ადამიანებმა უნდა ვისწავლოთ შემწყანარებლობა, უნდა დავიწყოთ საუბარი და ამას უნდა მოჰყვეს შერიგება, სიძულვილის ენა უნდა ამოვიღოთ. პირველი პირების ციხეში მოთავსება არასწორი პრაქტიკაა ამ ქვეყანაში. პრეზიდენტი ციხეში არ უნდა იჯდეს. ამიტომ მოვაწერე ხელი პეტიციას", - განუცხადა ტვ პირველს მეუფემ.

პეტიციას ხელი მოაწერა მარგვეთისა და უბისის ეპისკოპოსმა მეუფე მელქისედეკმაც.

შეგახსენებთ, მესამე პრეზიდენტის გათავისუფლების მოთხოვნით პეტიცია შეიქმნა.

"არ აქვს მნიშვნელობა მოგწონთ თუ არა მიხეილ სააკაშვილი. აქ მთავარია კითხვა, რომელზე პასუხი ყველას გვაქვს და ეს კითხვა ასეთია: გვაქვს თუ არა საქართველოში დამოუკიდებელი მართლმსაჯულება, არის თუ არა რიგითი მოსამართლე თავისუფალი პოლიტიკური გავლენებისგან და შეგვიძლია თუ არა ვანდოთ ივანიშვილის სახელისუფლებო გუნდს საქართველოს მესამე პრეზიდენტის გასამართლება. #თავისუფლებამიშას", - ნათქვამია პეტიციის ტექსტში.

მიხეილ სააკაშვილი თბილისში 1-ელ ოქტომბერს დააკავეს. ის რუსთავის მე-12 პენიტენციურ დაწესებულებაში იმყოფება. პატიმრობის პირველივე დღიდან სააკაშვილმა შიმშილობა გამოაცხადა.