სააკაშვილი არის ბრძოლით აღსავსე, მიაჩნია, რომ ეს ბრძოლა ოპოზიციამ ყველა შემთხვევაში უნდა მოიგოს და მოიგებს კიდეც, – ამის შესახებ ოპოზიციონერმა დეპუტატმა თამარ კორძაიამ სასჯელაღსრულების დაწესებულებაში მიხეილ სააკაშვილის მონახულების შემდეგ განაცხადა.

„სრულ მზაობას გამოხატავს საკუთარს, პოლიტიკურს, მორალურს, რომ საქართველოს მოქალაქეებს დაუჭიროს მხარი ამ გადამწყვეტ ბრძოლაში, რომელსაც ჰქვია ივანიშვილის დამარცხება. ჩვენი ხელისუფლების გონივრულობის იმედი არ გვქონია, დარწმუნებული ვარ, არც მიხეილ სააკაშვილს აქვს ხელისუფლების გონივრულობის იმედი, მაგრამ ჩვენი მოქალაქეების და პოლიტიკოსების ბრძოლა თავის შედეგებს აჩვენებს. ჩვენ დავინახეთ ევროპარლამენტარებისა და საერთოდ მსოფლიოს პოლიტიკოსების ერთობლივი განცხადება, რომლითაც ისინი მიმართავენ ევროპარლამენტის პრეზიდენტს და ითხოვენ სათანადო რეაგირებას, რადგან  დემოკრატიულ სამყაროში არავის სჯერა, რომ საქართველოში მართლმსაჯულება არის დამოუკიდებელი და მის მიმართ საზოგადოებას აქვს ნდობა...

მთელი ამ ხნის განმავლობაში რაც იქ ვიყავი, ის (სააკაშვილი) აქტიურად საუბრობდა, საკუთარ მოსაზრებებს მიზიარებდა, აინტერესებდა გარეთ მომხდარი მოვლენების შესახებ ინფორმაცია. არავითარი დაბრკოლება ამ კომუნიკაციაში ჩვენ არ გვქონია. მე, როგორც პოლიტიკოსი, შევედი პოლიტიკოსთან და მივიღე პასუხი მისგან, რომ ის არის ძალიან აქტიური, არ აპირებს დანებებას, მიუხედავად მისი ფიზიკური მდგომარეობისა. მორალურად ის არის აბსოლუტურად მხნე და მზად ბრძოლისათვის.“, – განაცხადა თამარ კორძაიამ.