მიხეილ სააკაშვილის გადაწყვეტილებით, ის არ მიიღებს სამედიცინო კონსილიუმში მონაწილეობას, ვიდრე არ იქნება დაშვებული ალტერნატიული სამედიცინო კომისია, - ამის შესახებ რუსთავის ციხიდან გამოსულმა ადვოკატმა ნიკა გვარამიამ განაცხადა.

"სააკაშვილის გადაწყვეტილებით, იგი ექიმთა კონსილიუმში აღარ მიიღებს მონაწილეობას. ანუ აღარ გაივლის მათ კვლევას, იმ დრომდე ვიდრე არ იქნება დაშვებული ალტერნატიული სამედიცინო კომისია. პირადად ყველა ექიმის მიმართ გამოხატავს პატივისცემას და ნდობას, თუმცა მიიჩნევს, რომ ეს პლატფორმა მნიშვნელოვნად არის პოლიტიზირებული, ექიმებისგან დამოუკიდებელი მიზეზების გამო, აღარ გამოხატავს მის ინტერესებს, აღარ ემსახურება მისი ჯანმრთელობის მგომარეობის გაუმჯობესებას და იქ ექიმების ხმა არის დაკარგული.

მოვუწოდებ კონსილიუმში შემავალ ყველა ექიმს, მოვიდა დრო, რომ საჯაროდ ისაუბრონ. ვიდრე არ იქნება დაშვებული ალტერნატიული კომისია მარიამ ჯიშკარიანის ხელმძღვანელობით, სააკაშვილი არ მიიღებს სამედიცინო კონსილიუმში მონაწილეობას. ასევე ვთხოვ სამედიცინო კონსილიუმის წევრ ექიმებს მოუწოდონ ხელისუფლებას, რომ ალტერნატიული მექანიზმები იყოს დაშვებული", - განაცხადა ნიკა გვარამიამ.

ყოფილი პრეზიდენტი მიხეილ სააკაშვილი უკვე 35-ე დღეა, ციხეში შიმშილობს.