საქართველოში ევროკავშირის ელჩის, კარლ ჰარცელის თქმით, ევროკავშირი ქვეყნის მესამე პრეზიდენტის, მიხეილ სააკაშვილის ირგვლივ განვითარებულ პროცესებს ყურადღებით აკვირდება.

ელჩმა ყურადღება გაამახვილა როგორც მიხეილ სააკაშვილის უფლებების დაცვის, ასევე, მისთვის შესაბამისი სამედიცინო მომსახურების გაწევის აუცილებლობაზე და აღნიშნა, რომ ამ ყველაფერზე პასუხისმგებლობა საქართველოს ხელისუფლებას ეკისრება.

"ყურადღებით ვაკვირდებით საქართველოს მესამე პრეზიდენტის, მიხეილ სააკაშვილის ირგვლივ განვითარებულ პროცესებზე სანდო ადგილობრივ პარტნიორებთან ერთად, როგორიც არის სახალხო დამცველი. ევროკავშირმა განაცხადა, რომ სააკაშვილის უფლებების დაცვა და სამართლებრივი პროცესების შესრულება, საკვანძოა და არის ხელისუფლების სრული პასუხისმგებლობა. ეს უფლებები მოიცავს გამჭვირვალე, სამართლიანი სასამართლოს უფლებას და შესაბამის სამედიცინო მომსახურებას, ისევე, როგორც მისი პატივისა და ღირსების დაცვას სასჯელაღსრულების დაწესებულებაში მისი ყოფნის დროს. საქათველოს ხელისუფლებამ უნდა გააკეთოს ყველაფერი, რათა მისი ეს უფლებები სრულად იქნას დაცული", - თქვა კარლ ჰარცელმა.