მიხეილ სააკაშვილი არის სუსტად, განაცხადა საქართველოს მესამე პრეზიდენტის ერთ-ერთმა ადვოკატმა დიმიტრი საძაგლიშვილმა.

მისი თქმით, მიხეილ სააკაშვილის შიმშილობის ამ ფაზაში მდგომარეობა არის არაპროგნოზირებადი.

"ჯანმრთელობის მდგომარეობას რაც შეეხება, ჯანმრთელობის მდგომარეობა არის ისევ ისეთი, როგორც აქამდე იყო - ის არის სუსტად. ყველაზე მნიშვნელოვანი არის ის, რომ შიმშილობის ამ ფაზაში უკვე არაპროგნოზირებადი სიტუაციის წინაშე ვდგებით, არ ვიცით, როდის მოხდება დრამატული გაუარესება მისი ჯანმრთელობის მდგომარეობის. მას შესთავაზეს დღეს გადასხმების გაკეთება, რაზეც უარი განაცხადა", - თქვა დიმიტრი საძაგლიშვილმა.

მისივე თქმით, მიხეილ სააკაშვილმა აღნიშნა, რომ უკეთესი სამედიცინო სერვისი ჰქონდა რუსთავის მე-12 დაწესებულებაში.

"ის აგრძელებს შიმშილობას. მისი პოზიცია ამასთან დაკავშირებით მყარია... ეს სულაც არ არის საავადმყოფო. თავად მიხეილ სააკაშვილმაც აღნიშნა, რომ უკეთესი სამედიცინო სერვისი ჰქონდა რუსთავის მე-12 დაწესებულებაშიც კი. ეს შენობა არის 2 ნაწილად გაყოფილი, ერთ ნაწილში არის იზოლირებული მიხეილ სააკაშვილი, მაგრამ ამ ნაწილში სამედიცინო სერვისის მიწოდება თითქმის შეუძლებელი, რადგან მეორე ნაწილია ზუსტად სამედიცინო სერვისების გასაწევად", - ამბობს დიტო საძაგლიშვილი.