დღეს საქართველოს ხელისუფლებამ ძალიან ღიად და აშკარად შეაქცია ზურგი ჩვენს საუკეთესო მეგობრებს ევროპაში, - ამის შესახებ საქართველოს პარლამენტში გამართულ ბრიფინგზე „ნაციონალური მოძრაობის“ წევრმა სალომე სამადაშვილმა ევროპარლამენტარებისთვის ხელისუფლების მიერ მიხეილ სააკაშვილთან შესვლაზე უარის თქმის შესახებ საუბრისას განაცხადა.

მისი თქმით, უახლოეს მომავალში საქართველოს ევროპელი პოლიტიკოსების კიდევ უფრო წარმომადგენლობითი და ამჯერად მრავალრიცხოვანი შემადგენლობა ეწვევა

მისი თქმით, ევროპელი კოლეგების ვიზიტი იქნება საქართველოს ხელისუფლებაზე სერიოზული წნეხის დაწყება.

„დღეს საქართველოს ხელისუფლებამ ძალიან ღიად და აშკარად შეაქცია ზურგი ჩვენს საუკეთესო მეგობრებს ევროპაში. პარლამენტში მოსვლამდე მქონდა ძალიან ხანგრძლივი საუბარი ანა ფოტიგასთან, ასევე მქონდა ხანგრძლივი სატელეფონო საუბარი ლიტვის პარლამენტის საქართველოსთან მეგობრობის ჯგუფის ხელმძღვანელთან და მასაც უარი უთხრეს ციხეში შესვლაზე. მინდა გითხრათ, „ქართულმა ოცნებამ“ თავად აირჩია ის გზა, რომელიც გაგრძელდება აუცილებლად ჩვენი გამარჯვებით. დღეიდან იწყება ძალიან აქტიური ბრძოლა ჩვენი ევროპელი მეგობრების მხრიდან, რათა გადავარჩინოთ სააკაშვილის სიცოცხლე და ჯანმრთელობა, ასევე დავიცვათ ქვეყნის ევროპული მომავალი", - განაცხადა სამადაშვილმა.