უკრაინამ აშშ-სგან 80 ტონა საბრძოლო მასალა მიიღო. კიევში აშშ-ის საელჩოს ინფორმაციით, ეს არის მეოთხე ოარტია ვაშინგტონის სამხედრო დახმარების ფარგლებში, რომლის ღირებულებაც 60 მლნ დოლარია.  

ამერიკული სამხედრო დახმარების შესახებ შეთანხმება მიღწეული იყო აშშ-ში უკრაინის პრეზიდენტის ვოლოდიმირ ზელენსკის ვიზიტის დროს. საუბარი შეეხებოდა კიდევ 60 მლნ დოლარის ღირებულების ტვირთს. დამატებითი დახმარების წინა პარტიები კიევში 10, 19, და 22 ოქტომბერს ჩავიდა.

შეიარაღების მიწოდება დონბასში სიტუაციის გამწვავების ფონზე მიმდინარეობს. ამერიკული მედია აღნიშნავდა, რომ აშშ-ს აქვს მონაცემები უკრაინის წინააღმდეგ შესაძლო სამხედრო ოპერაციის შესახებ. კრემლი აღნიშნულ ინფორმაციას უსაფუძვლოს უწოდებს.

უკრაინამ ბოლო წლების განმავლობაში აშშ-სგან სამხედრო დახმარება არაერთხელ მიიღო. დონალდ ტრამპის პრეზიდენტობის დროს ვაშინგტონმა კიევს 2017 და 2018 წლებში სამხედრო დახმარების ფარგლებში 350 მლნდ დოლარი გამოუყო, 2019 წელს - 250 მლნ, 2020 წელს კი  - 300 მლნ დოლარი. ამის გარდა ტრამპის ადმინისტრაციამ დაამტკიცა კიევისთვის ლეტალური იარაღის მიყიდვა - უკრაინამ მიიღო ტანკსაწინააღმდეგო კომპლექსები Javelin.