23 ევროპარლამენტარი მიხეილ სააკაშვილის ჯანმრთლობის მდგომარეობასთან დაკავშირებით ერთობლივი განცხადებით მიმართავს ევროკომისიის პრეზიდენტს, ურსულა ფონ დერ ლაიენს, ევროპული საბჭოს პრეზიდენტს შარლ მიშელს და ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, ჟოზეპ ბორელს.

ერთობლივ წერილში ევროპარლამენტარები შეშფოთებას გამოთქვამენ მიხეილ სააკაშვილის ჯანმრთელობის მდგომარეობისა და მის მიმართ ხელისუფლების მიერ განხორციელებული ქმედებების გამო.

ევროპარლამენტარები მიხეილ სააკაშვილისადმი "არაადამიანურ მოპყრობაზე" პასუხისმგებელ პირთა სანქცირების საკითხის განხილვას ითხოვენ.

ევროპელი პოლიტიკოსების განცხადებით, იმის მიუხედავად, დამნაშავე არის თუ არა მის მიმართ წაყენებულ ბრალდებებში, სააკაშვილის უფლებები და ღირსება დაცული უნდა იყოს.

"მიუხედავად იმისა, სააკაშვილი დამნაშავეა თუ არა მის მიმართ წაყენებულ ბრალდებებში, მისი ღირსება და უფლებები დაცული უნდა იყოს. როგორც სჩანს, მას უარი ეთქვა ადეკვატურ სამედიცინო დახმარებაზე პოლიტიკური საფუძველით. ასევე, საქართველოს სპეციალურმა პენიტენციურმა სამსახურმა უარი უთხრა მას დასწრებოდა საკუთარ სასამართლო პროცესებს თბილისის საქალაქო სასამართლოში“, - ვკითხულობთ წერილში.

ევროპარლამენტარები ასევე შეშფოთებას გამოთქვამენ იმასთან დაკავშირებით, ევროპელ პოლიტიკოსებს უარი უთხრეს მიხეილ სააკაშვილთან ციხეში შესვლაზე.

ამასთან, წერილში აღნიშნულია, რომ მიუხედავას სააკაშვილის საქმეში ადამიანის უფლებათა ევროპული სასამართლოს ჩართვისა, ევროკავშირმაც უნდა მიიღოს ზომები.

"რადგან არსებობს გამოუსწორებელი ზიანის საშიშროება, ევროკავშირმა უნდა განიხილოს მიხეილ სააკაშვილის მიმართ არაადამიანურ და დამამცირებელ მოპყრობაში მონაწილე პირების სანქცირების საკითხი", - წერენ ევროპარლამენტარები.