გერმანიის საგარეო საქმეთა მინისტრი ჰაიკო მაასი გერმანიასა და ევროპაში არალეგალი მიგრანტების მიღების წინააღმდეგია, რომლებიც ბელარუსი-პოლონეთის, ლატვიისა და ლიეტუვის საზღვრებთან იმყოფებიან და ევროკავშირის ტერიტორიაზე შეღწევას ცდილობენ. ამის შესახებ მაასმა გაზეთ Bild-თან ისაუბრა.

„ორშაბათს ევროპის ქვეყნების საგარეო საქმეთა მინისტრების შეხვედრაზე ყველანი შევთანხმდით, რომ ეს ადამიანები უნდა დაბრუნდნენ იმ ქვეყნებში, საიდანაც ჩამოვიდნენ, სხვა შემთხვევაში ლუკაშენკა გაიმარჯვებს“, - განაცხადა მაასმა. მან აღნიშნა, რომ ევროკავშირის წევრებს არ სურთ კედლის აღმართვა ევროპის გარშემო, „მაგრამ მას, ვინც მიგრაციის მოწესრიგებისკენ ისწრაფვის, უნდა აღელვებდეს, ის რომ ყოველდღე, ვისაც მოუნდება საზღვარი არ გადმოკვეთოს“, - თქვა მაასმა.

მაასის თქმით, გერმანიამ უკვე მიიღო 10 თასამდე მიგრანტი, რომლებიც ბელარუსიდან ევროკავშირში გადავიდნენ. მისივე თქმით, მნიშვნელოვანია, რომ ჰუმანიტარული დახმარება მათ ადგილზე მიიღონ. „ეს ხდება, მაგრამ ადამიანები თავიანთ ქვეყნებში უნდა დაბრუნდნენ“, - აღნიშნა მან.

ბელარუსი-პოლონეთის, ლიეტუვისა და ლატვიის საზღვრებთან კრიზისი 8 ნოემბერს გამწვავადა. რამდენიმე ათასი ადამიანი ბელარუსის მხრიდან პოლონეთის საზღვარს მიაწყდა. ზოგიერთმა მათგანმა პოლონეთის ტერიტორიაზე მოხვედრა სცადა და გაარღვია ეკლიანი მავთულხლართები. დაპირისპირების შედეგად დაშავდა 20-მდე პოლონელი მესაზღვრე. მიგრანტებს ამ დრომდე პოლონეთის საზღვართან კარვები აქვთ გაშლილი და ტერიტორიის დატოვებას არ აპირებენ.

ევროკავშირი მინსკს კრიზისის განზრახ ესკალაციაში ადანაშაულებს. ბელარუსის პრეზიდენტმა ალიაქსანდრ ლუკაშენკამ განაცხადა, რომ ამ სიტუაციაში დამნაშავე თავად დასავლეთის ქვეყნებია, რომელთა ქმედებების გამო ადამიანები ომს გაურბიან და ევროპაში მოხვედრას ცდილობენ.