სახალხო დამცველის მიერ შექმნილი ექიმთა ჯგუფის წევრის გიორგი პაპიაშვილის შეფასებით, ყოფილი პრეზიდენტის მიხეილ სააკაშვილის თავისუფლად, ბადრაგის გარეშე მკურნალობის სამედიცინო საფუძველი არ არსებობს. ამის შესახებ ის სოციალურ ქსელში წერს.

"მიკავშირდებიან ჟურნალისტები და მთხოვენ ჩემი მოსაზრების გამოხატვას გუშინ ბატონი ნიკოლოზ ყიფშიძის მიერ გამოთქმული წინადადების შესახებ პაციენტის თავისუფალ მკურნალობასთან დაკავშირებით. მიმაჩნია, რომ ამისთვის სამედიცინო საფუძველი არ არსებობს. ჩვენი ჯგუფი შეიქმნა ერთადერთი მიზნით, რომ შეგვეფასებინა გლდანის მე-18 დაწესებულებაში მყოფი პაციენტის მდგომარეობა და რისკები იქ დარჩენის და შიმშილობის გაგრძელების შემთხვევაში.

ჩვენმა გუნდმა ეს გააკეთა პაციენტის სიცოცხლისა და ჯანმრთელობის საუკეთესო ინტერესების გათვალისწინებით, რის შედეგადაც მოხერხდა ის, რომ დღეს პაციენტი არის გორის ჰოსპიტალში კვალიფიციური სამედიცინო გუნდის ხელში, მას შეწყვეტილი აქვს შიმშილობა და მისი მდგომარეობა გაუმჯობესებულია. მიუხედავად იმისა, რომ გარკვეული საფრთხეები ჯერ კიდევ არსებობს კვების აღდგენის პროცესში, სრულიად დარწმუნებული ვარ, რომ იმ ექიმებს, ვინც მას ამჟამად მკურნალობენ, შესწევთ უნარი პაციენტის სრულყოფილი რეაბილიტაციის" – წერს პაპიაშვილი Facebook-ზე.

სააკაშვილის პირადი ექიმის, ნიკოლოზ ყიფშიძის აზრით, სააკაშვილის პატიმრობა უნდა გადავადდეს და მას ციხის გარეთ, ბადრაგის თანხლების გარეშე, თავისუფლად მკურნალობის უფლება უნდა მიეცეს.