ბელარუსის პრეზიდენტმა ალიაქსანდრ ლუკაშენკამ, რომელიც პოლონეთის საზღვართან ჩავიდა, გერმანიას, მოუწოდა წაიყვანოს მიგრანტები თავის ქვეყანაში.

„აქ არიან ადამიანები, რომლებსაც თავიანთ ოჯახებთან გაერთიანება სურთ, წაიყვანეთ ისინი თქვენთან, ეს გერმანიისთვის დიდი დატვირთვა არ არის, მაგრამ ამას პოლონელები ბლოკავენ“,  - განაცხადა ლუკაშენკამ ბელარუს-პოლონეთის საზღვრის გამშვებ პუნქტთან.

მისი თქმით, პოლონეთს თავისი პრობლემებისგან ყურადღების გადატანა სურს. „პოლონეთის ხელისუფლებამ ჭკუა დაკარგა, დაკარგა რეალობის შეგრძნების უნარი. პატივცემულო პოლონელებო, მოიყვანეთ გონზე თქვენი პოლიტიკოსები“, - თქვა ლუკაშენკამ.

მისი თქმით, ბელარუსში, 2-ათასიანი ბანაკის გარდა 5 ათასამდე მიგრანტი იმყოფება.

 „აქ სხვადასხვა ადამიანია. მაგრამ თქვენ ერთი საერთო პრობლმა გაქვთ. თქვენ უბდურება დაგატყდთ თავს. დარწმუნებული ვარ, ეს დროებითია, ყველაფერს ისე გავაკეთებთ, როგორც თქვენ გსურთ, თუნდაც ეს ცუდი იყოს პოლონელების, ლატვილებისა და სხვებისთვის. ვისაც სახლში დაბრუნება უნდა, დავეხმარებით. მაგრამ ძალას არ დავატანთ. ეს თქვენი უფლებაა“, - დასძინა ლუკაშენკამ.  

საზღვარზე კრიზისი 8 ნოემბერს გამწვავდა. რამდენიმე ათასი ადამიანი ბელარუსის მხრიდან პოლონეთის საზღვარს მიაწყდა. ზოგიერთმა მათგანმა პოლონეთის ტერიტორიაზე მოხვედრა სცადა და გაარღვია ეკლიანი მავთულხლართები. დაპირისპირების შედეგად დაშავდა 20-მდე პოლონელი მესაზღვრე. მიგრანტებს ამ დრომდე პოლონეთის საზღვართან კარვები აქვთ გაშლილი და ტერიტორიის დატოვებას არ აპირებენ.

ევროკავშირი მინსკს კრიზისის განზრახ ესკალაციაში ადანაშაულებს. ბელარუსის პრეზიდენტმა ალიაქსანდრ ლუკაშენკამ განაცხადა, რომ ამ სიტუაციაში დამნაშავე თავად დასავლეთის ქვეყნებია, რომელთა ქმედებების გამო ადამიანები ომს გაურბიან და ევროპაში მოხვედრას ცდილობენ.

პოლონეთის პრემიერ-მინისტრმა მათეუშ მორავეცკიმ გნაცხადა, რომ მთავრობა მიგრაციული კრიზისის ფონზე მზად არის ბელარუსის მიმართ სანქციები გაამკაცროს, მათ შორის სრულად ჩაკეტოს სასაზღვრო პუნქტები ბელარუსიდან სატვირთო გადაზიდვების შეწყვეტის მიზნით.

ევროკავშირმა მიგრანტების კრიზისის გამო ბელარუსის წინააღმდეგ სანქციათა ახალი პაკეტი მოამზადა.