ირაკლი ღარიბაშვილი ქვეყნის პატრიოტი კაცია, მისი მხრიდან თანამდებობის დატოვების საფუძველი არ არსებობს, -  განაცხადა ფრაქცია "ქართული ოცნების თავმჯდომარე მამუკა მდინარაძემ. მისი თქმით, ინფორმაცია, რომ ირაკლი ღარიბაშვილი უახლოეს მომავალში თანამდებობის დატოვებას აპირებს, ჭორია.

ამასთან, მისივე თქმით,  ჯანდაცვის მინისტრ ეკატერინე ტიკარაძესა და პრემიერ მინისტრ ირაკლი ღარიბაშვილს შორის არანაირი დაპირისპირება არ ყოფილა.

"პირდაპირ გეუბნებით, ყოველგვარი გადაჭარბების გარეშე, არა თუ დაპირისპირება გუნდის შიგნით ლიდერებს შორის, არამედ პირიქით, ასეთი მყარი ბოლო წლების განმავლობაში გუნდის შიგნით ლიდერებს შორის ურთიერთობა არ ყოფილა. ტიკარაძემ თქვა, რომ ხელმძღვანელობდა უწყებას ურთულეს პერიოდში. ურთულესია, საპასუხისმგებლოა, ნებისმიერ ადამიანს გააჩნია რაღაც რესურსი, რომლის შემდეგაც ფიქრობს, რომ რაც შეეძლო გააკეთა და ახლა უნდა წავიდეს და სხვამ გააგრძელოს - დაახლოებით ეს ვორდინგი ჰქონდა. ღარიბაშვილი არის ის პრემიერი, რომელსაც უკვე ძალიან დიდი გამოცდილება აქვს. ამ ქვეყნის პატრიოტი კაცია, საფუძველი არ არსებობს, გარდა თქვენს მიერ მოგონილი ჭორებისა, რომ მისი მხრიდან თანამდებობის დატოვებაზე ვიფიქროთ", - განუცხადა მდინარაძემ ჟურნალისტებს.