სააკაშვილის აზრები ჩვენ არ გვაინტერესებს, ის ჩვენი საზოგადოებისთვის აქტუალური არ არის, – ამის შესახებ პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა განაცხადა.

მისივე თქმით, სააკაშვილი სრულად მოიხდის სასჯელს, რომელიც მას კანონით აქვს დაკისრებული.

„ის სრულად მოიხდის სასჯელს, რაც მას კანონით აქვს დაკისრებული. ჩემი თხოვნა იქნება, ჩვენს საზოგადოებას დროს ნუ დააკარგვინებთ ამ შეკითხვებზე პასუხის მოსასმენად. ჩვენთვის ეს ადამიანი აქტუალური არ არის. მას კანონის შესაბამისად აქვს მიკუთვნებული ადგილი, სადაც უნდა იყოს. თუკი შეიძლება, რომ მასთან დაკავშირებით ვინმემ გააკეთოს კომენტარი ეს, პენიტენციური სამსახურია“, – განაცხადა ოხანაშვილმა.

ანრი ოხანაშვილმა სალომე ზურაბიშვილის მიერ ჯო ბაიდენის ინიციატივით გამართულ დემოკრატიის სამიტზე გაკეთებულ განცხადებაზე საუბრისას აღნიშნა, რომ პრეზიდენტი უფლებამლსილია ისაუბროს იმ თემაზე, რაც მან სამიტზე გააჟღერა. მისივე თქმით, თუკი ვინმე ორიენტირებულია პოლარიზაციაზე, ესაა „ნაციონალური მოძრაობა“.

„პრეზიდენტი უფლებამოსილია, ისაუბროს იმაზე, რა ინიციატივაც გააჟღერა. თუკი ვინმე ორიენტირებულია პოლარიზაციაზე, ესაა ის მარგინალური, დესტრუქციული ჯგუფი, რომელსაც ჰქვია „ნაციონალური მოძრაობა“, რომელსაც აქვს შესაბამისი რაოდენობით პარლამენტში მუშაობის  მანდატი და არ ახორციელებენ მათთვის კონსტიტუციით დაკისრებულ უფლებამოსილებებს. ამიტომ ეს კითხვები „ნაციონალურ მოძრაობას“ უნდა დაუსვათ, როდის აპირებენ, დაბრუნდნენ საქართველოს პარლამენტში და იმუშაონ“, – განაცხადა ანრი ოხანაშვილმა.

სალომე ზურაბიშვილმა დემოკრატიის სამიტზე თქვა, რომ წამოიწყებს ინკლუზიურ პროცესს, რომელშიც ჩართული იქნება მთელი საზოგადოება. „პირობას ვდებ, წამოვიწყებ ინკლუზიურ პროცესს, საუბარს ეროვნული მასშტაბით, რომელშიც ჩაბმული იქნება მთელი საზოგადოება, რათა მივაღწიოთ უახლესი ისტორიის საერთო აღქმას, დავძლიოთ ტკივილი და წინ წავიდეთ“, - განაცხადა ზურაბიშვილმა.