ევროპარლამენტარი ვიოლა ფონ კრამონი სოციალურ ქსელში ეხმიანება საქართველოს პრეზიდენტის, სალომე ზურაბიშვილის გუშინდელ შეხვედრას და მის გამოსვლას.

„საქართველოს საერთაშორისო მეგობრები ეთანხმებიან საქართველოს პრეზიდენტს, მეტს ვნახავთ უახლოეს მომავალში“, – წერს ვიოლა ფონ კრამონი „ტვიტერში“.

საქართველოს პრეზიდენტმა სალომე ზურაბიშვილმა საპარლამენტო და არასაპარლამენტო პოლიტიკური პარტიების წარმომადგენლებს ორბელიანების სასახლეში გუშინ უმასპინძლა.

მან სიტყვით გამოსვლისას აღნიშნა, რომ დაიღალა პოლარიზებითა და გაუთავებელი დაძაბულობით, ამიტომ აუცილებელია ახალ პოლიტიკაზე გადასვლა.

"ეს ერთად დგომა, მგონი, პოზიტივია და პოზიტივად იქნება აღქმული ჩვენი საზოგადოების მიერ, რომელიც ძალიან მძიმედ განიცდის დღეს უკვე ამ გაუთავებელ პოლარიზაციას, გაუთავებელ დაძაბულობას, რომელმაც ჩაძირა რეალურად ჩვენი ქვეყანა, გააჩერა ჩვენი ქვეყანა. პრაქტიკულად არ არის საკითხი, რომლის გადაწყვეტა შეგვიძლია დღეს ამ პოლარიზაციიდან გამომდინარე. ამდენად, მგონია, რომ ამ პროცესის დაწყება არის დროული და გეტყვით, რატომ მიმაჩნია ასე. ერთი მხრივ იმოტომ, რომ 30 წელი გავიდა, ჩვენი სახელმწიფო უკვე არის 30 წლის, ზრდასრული სახელმწიფო და დროა, გამოვიდეთ ამ რაღაცა ახალგაზრდული, ვიტყოდი, ჯახიდან და გადავიდეთ უფრო დამწიფებულ პოლიტიკაზე, ახალ პოლიტიკაზე“, – განაცხადა სალომე ზურაბიშვილმა.