პარლამენტის წევრი ვარ და მე ვერ გადავიხდი. მით უმეტეს, ახალი წელი მოდის, ყოველ კაპიკს ფასი აქვს. ვერ გადავიხდი ერთბაშად 250 ლარს, - ამის შესახებ პარტია "მოქალაქეების" ლიდერმა და საქართველოს პარლამენტის დეპუტატმა ალეკო ელისშვილმა "პალიტრანიუსის" ეთერში განაცხადა.

მისი თქმით, დედაქალქის მერის კახა კალაძის ერთ-ერთი მთავარი დანაშაული ის არის, რომ სამარშრუტო ტაქსები არ გააუქმა.

"კალაძის ერთ-ერთი მთავარი დანაშაული არის, რომ "მარშუტკები" დატოვა. მაფიოზია ერთი, მაქაცარია, რომლისაც არის "მარშუტკები". სამარცხვინო ტრანსპორტია, რომელსაც გაჩერება საერთოდ არ აქვს ფიქსირებული, "გამიჩერეთი" რომ დადის", - ამბობს ელისაშვილი.

მისი თქმით, სწორედ სამარშრუტო ტაქსების გამო ძვირდება მგზავრობა.

"რა მუნიციპალური ტრანსპორტია დღეს თბილისში? მეტრო, ავტობუსი, რომელიც მერიას ეკუთვნის და "მარშუტკები". ეს "მარშრუტკები" აფუჭებს ყველაფერს. "მარშრუტკების" გამო არის, რომ გაძვირდა. უზარმაზარი დანახარჯი აქვს მეტროსაც, ავტობუსსაც, დოტაციურია ვერანაირად მოგებაზე ვერ არის, მაგრამ სტრატეგიის ამბავია", - აცხადებს ელისაშვილი.

პირველი თებერვლიდან თბილისში საზოგადოებრივი ტრანსპორტის სააბონენტო სისტემა ამოქმედდება.

სააბონენტო სისტემის ფასები:

    ულიმიტო 90-წუთიანი ბარათი -1 ლარი;
    ულიმიტო 1-დღიანი ბარათი - 3 ლარი;
    ულიმიტო 1-კვირიანი ბარათი - 20 ლარი;
    ულიმიტო 1-თვიანი - 40 ლარი;
    ულიმიტო 3-თვიანი ბარათი - 100 ლარი;
    ულიმიტო 6-თვიანი ბარათი - 150 ლარი;
    ერთწლიანი ბარათი - 250 ლარი.