საპროცედურო საკითხთა და წესების და ადამიანის უფლებათა დაცვისა და სამოქალაქო ინტეგრაციის კომიტეტებმა სახელმწიფო ინსპექტორის სამსახურის გაუქმების ინიციატივას მხარი დაუჭირეს.

საპროცედურო საკითხთა და წესების და ადამიანის უფლებათა დაცვისა და სამოქალაქო ინტეგრაციის კომიტეტებმა "სახელმწიფო ინსპექტორის სამსახურის შესახებ" საქართველოს კანონში ცვლილების შეტანის თაობაზე" კანონპროექტი ერთობლივ სხდომაზე განიხილეს.

პარლამენტის წევრების რატი იონათამიშვილის, გივი მიქანაძის, გიორგი ამილახვარის, ანრი ოხანაშვილის, დავით მათიკაშვილის, ალუდა ღუდუშაურისა და გურამ მაჭარაშვილის საკანონმდებლო ინიციატივა ითვალისწინებს სახელმწიფო ინსპექტორის სამსახურის ნაცვლად ორი - სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნას.
 
აღნიშნული ცვლილებიდან გამომდინარე ცვლილება შედის ოცდაათზე მეტ კანონში, რომლებიც საკანონმდებლო პაკეტის სახით იყო სხდომაზე წარდგენილი.
 
პარლამენტის წევრმა, რატი იონათამიშვილმა კანონპროექტის წარდგენა სახელმწიფო ინსპექტორის სამსახურის თანამშრომლებისადმი მიმართვით დაიწყო და განაცხადა, რომ ამ უწყებაში ბევრი ღირსეული ადამიანი მუშაობს, რომელიც მაღალი კვალიფიკაციით ასრულებს ძალიან მნიშვნელოვან საქმეს.

"არავინ დაგაჯეროთ, რომ სახელმწიფო არ იდგება თქვენ გვერდით. მნიშვნელოვანია იცოდეთ, ჩვენი კატეგორიული რეკომენდაცია იქნება, რომ ამ ადამიანებს არა თუ გაუგრძელდეთ სამუშაო პირობები, არამედ უფრო მეტი ლეგიტიმაციით იმუშაონ. ამას უზრუნველყოფს ისიც, რომ ფაქტობრივად ერთის ნაცვლად იქნება ორი უწყება, სადაც კიდევ ემატება გარკვეული რეგულაციები და ვალდებულებები და ამ სფეროში მათზე გამოცდილი კადრები არც არსებობს ქვეყანაში. ბევრი სპეკულაცია გვესმის ამასთან დაკავშირებით სხვადასხვა მხარეებისგან და არავინ დაგაჯეროთ, რომ სახელმწიფო არ იდგება თქვენ გვერდით", - თქვა იონათამიშვილმა.

სხდომას ესწრებოდნენ საზოგადოებრივი ორგანიზაციების წარმომადგენლები. ასევე სახელმწიფო ინსპექტორის სამსახურის ხელმძღვანელი ლონდა თოლორაია, რომელმაც სხდომა პროტესტის ნიშნად დატოვა.

მანამდე თოლორაიამ ისაუბრა, რომ ინსპექტორის სამსახური დეკემბრიდან ცდილობდა, ინსტიტუციური გაძლიერების თაობაზე საკუთარი საკანონმდებლო წინადადება წარედგინა და პასუხი იყო ის, რომ დატვირთული გრაფიკის გამო ვერ მიიღებდნენ.

თოლორაიას თქმით, ეს ხდებოდა იმის პარალელურად, რომ მზადდებოდა ახალი პროექტი უწყების ლიკვიდაციაზე.

"რითი დავიმსახურე ან პირადად მე, ან სამსახურმა, რომ ამხელა ფარსში მონაწილეობა მიგვაღებინეთ და მე წინადადებას ვწერ გაძლიერებაზე და თქვენ თურმე საპასუხოდ გაუქმებაზე. მინიმუმ იმის გამბედაობა უნდა ჰქონდა ვინმეს, რომ ლონდა, აზრი არ აქვს, თავს ნუ აკლავ და სამშობიაროდან არ უნდა მეწერა კანონპროექტი მინიმუმ", - აღნიშნა ლონდა თოლორაიამ.

ცნობისთვის, დღეს 27 დეკემბერს ბიურომ ინსპექტორის სამსახურის გაუქმებაზე ცვლილებების დაჩქარებულად განხილვას მხარი დაუჭირა.

სახელმწიფო ინსპექტორის სამსახურის გაუქმებასთან დაკავშირებით მმართველი გუნდის ინიციატივაზე ინფორმაცია შაბათს, 25 დეკემბერს გავრცელდა.

სახელმწიფო ინსპეტორის სამსახურის გაუქმების კანონპროექტი გააკრიტიკეს არასამთავრობო ორგანიზაციებმა და სახალხო დამცველმა. კანონპროექტის დაჩქარებული წესით განხილვა დაგმო საქართველოს პრეზიდენტმა და პარლამენტს პროცესის შეჩერებისკენ მოუწოდა.