ყაზახეთის ყოფილმა პრეზიდენტმა ნურსულთან ნაზარბაევმა და მისმა ქალიშვილებმა თავიანთ ოჯახებთან ერთად ყაზახეთი დატოვეს. ამ დროისათვის ქვეყანაში მხოლოდ ნაზარბაევის უფროსი ძმა ბოლათი რჩება. ინფორმაციას ადგილობრივი გამოცემა Orda.kz ავრცელებს.

აღნიშნულ ინფრომაციას ჯერჯერობით არ ადასტურებენ სხვა წყაროები.

 შეგახსენებთ, ყაზახეთი საპროტესტო ტალღამ მოიცვა. მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

მწვავე პროტესტების ფონზე გადადგა ქვეყნის მთავრობა. ყაზახეთის უშიშროების საბჭოს თავმჯდომარის თანამდებობა დატოვა ნურსულთან ნაზარბაევმა.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. იუწყებიან, რომ შეტაკებებს ათეულობით დემონსტრანტი ემსხვერპლა, დაღუპულია 10-ზე მეტი პოლიციელი.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებული აგრესიის აქტად შეაფასა. ამასთან, თოყაევმა კოლექტიური უსაფრთოების ხელშეკრულების ორგანიზაციას დახმარების თხოვნით მიმართა. თოყაევმა ორგანიზაციას სამშვიდობო კონტიგენტის დროებით განთავსება სთხოვა, რაზედაც თანხმობა მიიღო. რუსეთმა მყისიერად უპასუხა ყაზახეთის პრეზიდენტის თხოვნას და სამშვიდობო ოპერაციის ეგიდით, ყაზახეთში სამხედროები გადაისროლა.

ქვეყნის მთელ ტერიტორიაზე გამოცხადებულია საგანგებო მდგომარეობა.