ეს ხდება რუსეთის ისტორიულ ტერიტორიაზე და ამიტომ არ შეგვიძლია ამ სისხლისღვრის მიმართ გულგრილები ვიყოთ, - განაცხადა რუსეთის პატრიარქმა კირილმა ყაზახეთში მიმდინარე მოვლენებზე საუბრისას.

 „ჩვენ ყველამ ვიცით, რომ ოდესღაც ჩვენი ერთიანი უზარმაზარი ქვეყნის ტერიტორიაზე მძიმე მოვლენები ვითარდება. ადამიანები შეეჯახნენ რთულ სამოქალაქო კონფლიტქს, რეალურად იღვრება სისხლი.

და ეს ჩვენს გვერდით ხდება, რუსეთის ისტორიულ ტერიტორიაზე და ამიტომ არ შეგვიძლია ამ სისხლისღვრის, ამ შეტაკებების, ამ განუკითხაობის მიმართ გულგრილები ვიყოთ. და დღეს ჩემი შესაძლებლობების ფარგლებში ვილოცე, რათა უფალმა წყალობა გაიღოს ყაზახი ხალხის მიმართ, რათა შეწყდეს დაპირისპრება და დამყარდეს მშვიდობა“, - განაცხადა რუსეთის პატრიარქმა.

შეგახსენებთ, ყაზახეთი საპროტესტო ტალღამ მოიცვა. მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

მწვავე პროტესტების ფონზე გადადგა ქვეყნის მთავრობა.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. იუწყებიან, რომ შეტაკებებს ათეულობით დემონსტრანტი ემსხვერპლა, დაღუპულია 10-ზე მეტი პოლიციელი.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებს ცეცხლი გაუფრთხილებლად გაუხსნან.

თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.